பட்ஜெட் முடிந்ததும் ஆக்ஷன் ஆரம்பம்…. செந்தில் பாலாஜியை அடுத்து சேகர் பாபு, கே.என். நேரு?…. தவெகவின் அடுத்த டார்கெட் லிஸ்ட்…. தலைமைச் செயலகத்தில் திடீர் பரபரப்பு…!

தமிழக சட்டமன்றத் தேர்தலின் போது வாக்களித்தபடி, கடந்த திமுக ஆட்சியில் நடைபெற்றதாகக் கூறப்படும் ஊழல்கள் மீது தீவிர நடவடிக்கை எடுத்து, குற்றவாளிகளுக்குத் தண்டனை பெற்றுத் தருவதில் தமிழக வெற்றிக் கழகத் தலைவரும் முதலமைச்சருமான விஜய் உறுதியாக உள்ளார். நடப்பு பட்ஜெட் கூட்டத்தொடர் நிறைவடைந்ததும், மாநில அரசியல் மற்றும் நிர்வாகத் துறையில் பல அதிரடி மாற்றங்களும் நடவடிக்கைகளும் அரங்கேறக்கூடும் என்று தலைமைச் செயலக வட்டாரங்கள் தெரிவிக்கின்றன.

ஏற்கனவே எ.வ.வேலு மற்றும் சிவசங்கர் ஆகியோர் மீதான நடவடிக்கைகளைத் தொடர்ந்து, தற்போது முன்னாள் அமைச்சர் செந்தில் பாலாஜியைக் குறிவைத்து டாஸ்மாக் முறைகேடு வழக்கை லஞ்ச ஒழிப்புத்துறை கையில் எடுத்துள்ளது. சென்னை, கரூர் உட்பட 41 இடங்களில் சோதனைகள் நடத்தப்பட்டு வழக்குப்பதிவு செய்யப்பட்டுள்ள நிலையில், இதன் தொடர்ச்சியாக சேகர் பாபு, கே.என்.நேரு, அன்பில் மகேஷ் உள்ளிட்ட திமுகவின் முக்கிய முன்னாள் அமைச்சர்களைக் குறிவைத்தும் அடுத்தடுத்து சோதனைகள் திட்டமிடப்பட்டுள்ளன.

அரசியல்வாதிகள் மட்டுமன்றி, கடந்த ஆட்சியில் முறைகேடுகளுக்கு உறுதுணையாக இருந்த உயர் அதிகாரிகள் மீதும் நடவடிக்கை பாயவுள்ளது. குறிப்பாக, முந்தைய ஆட்சியில் ஆதிக்கம் செலுத்தி, தற்போதும் முக்கியப் பொறுப்புகளில் இருக்கும் குமரகுருபரன், நந்தகுமார் உள்ளிட்ட ஐஏஎஸ் அதிகாரிகளின் செயல்பாடுகள் முதலமைச்சருக்கு கடும் அதிருப்தியை ஏற்படுத்தியுள்ளன. பழனி கோயில் நில விற்பனை முயற்சி மற்றும் மூடப்பட்ட டாஸ்மாக் கடைகளின் விவரங்களை வெளியிடாதது போன்ற சர்ச்சைகள், அரசுத் தலைமையின் நம்பிக்கையை அவர்கள் இழக்கச் செய்துள்ளன.

தற்போது பட்ஜெட் பணிகள் நடைபெறுவதால் நிர்வாகத் தேக்கத்தைத் தவிர்க்க அமைதி காக்கும் அரசு, கூட்டத்தொடர் முடிந்ததும் அதிரடி மாற்றங்களைச் செய்யத் திட்டமிட்டுள்ளது. திமுக ஆதரவு நிலைப்பாட்டுடன் செயல்படும் அதிகாரிகளை ஓரங்கட்டிவிட்டு, கடந்த ஆட்சியில் பழிவாங்கப்பட்ட நேர்மையான மூத்த அதிகாரிகளுக்கு முக்கியப் பொறுப்புகளை வழங்கப் பட்டியல் தயாராகி வருகிறது. முதலமைச்சரின் நேரடிப் பார்வையில் நடைபெறும் இந்நடவடிக்கை, எதிர்பார்ப்புகளைப் பூர்த்தி செய்யத் தவறும் தற்போதைய அமைச்சர்களுக்கும் அதிகாரிகளுக்கும் விடுக்கப்பட்ட நேரடி எச்சரிக்கையாகவே பார்க்கப்படுகிறது.