“நண்பா..”…. ரேஸ் மைதானத்தில் அஜித்துக்காக ஓடிய விஜய்…. லண்டன் செல்ல காரணமே இது தானா?…. தமிழக அரசு வெளியிட்ட அறிக்கை….!

தமிழ்நாட்டைத் தொழில் முதலீடுகளில் முன்னணி மாநிலமாக உயர்த்தும் நோக்கில், மாநில அரசு பல்வேறு தொலைநோக்குத் திட்டங்களை தீவிரமாகச் செயல்படுத்தி வருகிறது. இதன் ஒரு பகுதியாக, தமிழகத்தில் ஏற்கனவே வலுவாக நிலைபெற்றுள்ள வாகன மற்றும் மின்சார வாகன உற்பத்திக் கட்டமைப்பை மேலும் விரிவுபடுத்த உலகத்தரத்திலான “மோட்டார் ஸ்போர்ட்ஸ் நகரம்” (Motor Sports City) அமைக்கப்படும் என்று சட்டப்பேரவை விதி 110-ன் கீழ் அறிவிப்பு வெளியிடப்பட்டது. இந்த பிரம்மாண்ட திட்டத்தைச் செயல்படுத்துவதற்கும், பன்னாட்டு தொழில் முதலீடுகளை ஈர்ப்பதற்குமாக அரசுத் தரப்பில் முக்கியக் கட்ட நடவடிக்கைகள் தற்பொழுது எடுக்கப்பட்டு வருகின்றன.

இத்திட்டத்தின் நேரடிச் செயல்பாடுகளை ஆய்வு செய்வதற்காக இங்கிலாந்து நாட்டிற்குப் பயணம் மேற்கொண்ட முதலமைச்சர், உலகின் மிகவும் புகழ்பெற்ற ‘சில்வர்ஸ்டோன் மோட்டார் ரேசிங் சர்க்யூட்’ பகுதிக்கு நேரில் சென்றார். அங்குள்ள ரேஸ் கன்ட்ரோல் மற்றும் ரேஸ் சர்க்யூட் பகுதிகளைப் பார்வையிட்டதுடன், சர்வதேச அளவிலான நீண்டதூர கார் பந்தயங்களை நடத்துவதற்குத் தேவையான நவீனத் தொழில்நுட்பங்கள், செயல்பாட்டு நுட்பங்கள் மற்றும் உயர்தர பாதுகாப்பு அமைப்புகள் குறித்து வல்லுநர்களிடம் விரிவாகக் கேட்டறிந்தார். மேலும், மோட்டார் விளையாட்டுகளின் வரலாற்றுச் சிறப்புகளைப் பறைசாற்றும் சர்க்யூட் அருங்காட்சியகத்தையும் அவர் நேரில் சென்று பார்வையிட்டார்.

இந்தப் பயணத்தின் உச்சக்கட்ட நிகழ்வாக, சில்வர்ஸ்டோன் கிராண்ட் பிரிக்ஸ் பந்தயத் திடலில் நடைபெற்ற “2026 மிச்செலின் லீ மான்ஸ் கோப்பை” கார் பந்தயத்தை முதலமைச்சர் கொடியசைத்துத் தொடங்கி வைத்தார். இப்போட்டியில் பிரபல நடிகரும், சர்வதேச மோட்டார் கார் பந்தய வீரருமான அஜித்குமார் கலந்துகொண்டார். பந்தயத்திற்கு முன்பாக முதலமைச்சரும் நடிகரும் லண்டனில் சந்தித்துக் கொண்டதோடு, இருவருடைய உற்சாகமான சந்திப்பு நிகழ்வும் அனைவரின் கவனத்தையும் ஈர்த்தது. உலகளாவிய விளையாட்டுத் தளத்தில் இந்தியத் திறமையாளர்களின் பங்களிப்பை ஊக்குவிக்கும் வகையில் இந்தத் தொடக்கம் அமைந்தது.

சர்வதேச அளவிலான நீண்டதூர மோட்டார் பந்தயங்களில் பின்பற்றப்படும் பிரம்மாண்ட நிர்வாக ஏற்பாடுகள் மற்றும் நவீனத் தொழில்நுட்பங்களை நேரடியாகக் கண்டறிந்ததன் மூலம், தமிழகத்தில் அமையவுள்ள மோட்டார் ஸ்போர்ட்ஸ் நகரத்திற்கான முதற்கட்டப் பணிகள் மேலும் வலுப்பெற்றுள்ளன. சர்வதேச பந்தயங்களை நடத்தும் உள்கட்டமைப்பைத் தமிழகத்தில் உருவாக்குவதுடன், உலகளாவிய முதலீடுகளை ஈர்த்து இளைஞர்களுக்கான வேலைவாய்ப்புகளையும் விளையாட்டுத் துறையின் வளர்ச்சியையும் அடுத்தகட்டத்திற்கு எடுத்துச் செல்ல இந்தப் பயணம் பெரும் பாலமாக அமையும் என எதிர்பார்க்கப்படுகிறது.