ஒரு வீடியோவால் வந்த வினை!… சட்ட சிக்கலில் சியான் விக்ரம்?… இணையத்தில் தீயாய் பரவும் செய்தி… வனத்துறை அதிரடி…!!

நடிகர் விக்ரம் சமீபத்தில் தனது இன்ஸ்டாகிராம் பக்கத்தில் அரிய வகையான ‘லார் கிப்பான்’ என்ற குரங்குடன் விளையாடும் வீடியோ ஒன்றை வெளியிட்டார். தென்கிழக்கு ஆசியாவைச் சேர்ந்த இந்த பாதுகாக்கப்பட்ட உயிரினத்தை உரிய அனுமதியின்றி வளர்ப்பது சட்டவிரோதம் என்பதால், விலங்குகள் நல ஆர்வலர்கள் இதற்கு கடும் எதிர்ப்பு தெரிவித்தனர். இதனையடுத்து, விக்ரமின் சென்னை வீட்டிற்கு நேரில் சென்ற வனத்துறையினர், இந்த குரங்கு அவருக்கு எப்படி கிடைத்தது மற்றும் அதற்கான முறையான ஆவணங்கள் உள்ளனவா என்பது குறித்து மூன்று நாட்களுக்குள் விளக்கம் அளிக்கக் கோரி நோட்டீஸ் வழங்கியுள்ளனர்.

இந்த விவகாரம் குறித்து நடத்தப்பட்ட முதற்கட்ட விசாரணையில், சென்னை ஈஞ்சம்பாக்கத்தில் உள்ள விக்ரமின் சம்பந்தியான ரங்கநாதன் என்பவரின் பண்ணை வீட்டில்தான் இந்தக் குரங்கு வளர்க்கப்பட்டு வருவது தெரியவந்துள்ளது. விடுமுறைக்காக அங்கு சென்ற விக்ரம், அந்த குரங்குடன் வீடியோ எடுத்து பதிவிட்டுள்ளார். இந்த குரங்கின் பின்னணியை ஆராய்ந்த போது, மலேசியாவிலிருந்து மணிப்பூர் வழியாக ஈரோட்டைச் சேர்ந்த ஒருவருக்கு கைமாறி, அங்கிருந்து முறையான வனத்துறை அனுமதியின்றி விக்ரமின் உறவினர் வீட்டிற்கு விற்கப்பட்டது கண்டுபிடிக்கப்பட்டுள்ளது.

சர்ச்சை வெடித்ததை அடுத்து, தனது சமூக வலைதளப் பக்கத்திலிருந்து அந்த வீடியோவை நடிகர் விக்ரம் உடனடியாக நீக்கியுள்ளார். இருப்பினும், அந்த அரியவகை குரங்கு தற்போது எங்குள்ளது மற்றும் அதை வாங்கியதன் பின்னணி குறித்து உரிய விளக்கம் அளிக்கத் தவறினால், அவர் மீது கடுமையான சட்ட நடவடிக்கை எடுக்கப்படும் என வனத்துறை எச்சரித்துள்ளது. இந்தச் சம்பவம், வடமாநில எல்லைகள் வழியாக இந்தியாவிற்குள் சட்டவிரோதமாக வெளிநாட்டு வனவிலங்குகள் கடத்தப்படும் அபாயத்தை வெளிச்சத்திற்குக் கொண்டுவந்துள்ளதால், அதிகாரிகளும் தீவிர விசாரணையில் இறங்கியுள்ளனர்.