எங்கக்கிட்டயேவா..! அமெரிக்காவுக்கு சீனா விடுத்த ‘வார்னிங்’.. “பொய் சொன்னால் சும்மா விடமாட்டோம்” 50% வரி மிரட்டலுக்கு பெய்ஜிங் கொடுத்த பதிலடி..!!

ஈரான்-அமெரிக்கா இடையிலான போர் பதற்றம் நீடித்து வரும் நிலையில், அமெரிக்கா தன்மீது “புனையப்பட்ட குற்றச்சாட்டுகளை” முன்வைத்து வரி விதிப்புகளை மேற்கொண்டால், அதற்குப் பதிலடியாகக் கடுமையான நடவடிக்கைகளை எடுக்கப்போவதாக சீனா எச்சரித்துள்ளது. ஈரான் மீது அமெரிக்கா விதித்துள்ள ஹார்முஸ் ஜலசந்தி முற்றுகைக்கு மத்தியில், சீனா ஈரானுக்கு ராணுவத் தளவாடங்களை வழங்கத் திட்டமிட்டுள்ளதாக அமெரிக்க ஊடகங்கள் செய்தி வெளியிட்டன. இதனைத் தொடர்ந்து, சீனா மீது 50% வரை இறக்குமதி வரி விதிக்கப்போவதாக அதிபர் டொனால்ட் டிரம்ப் விடுத்த மிரட்டலுக்கு சீனா இவ்வாறு பதிலளித்துள்ளது.

பெய்ஜிங்கில் நடைபெற்ற செய்தியாளர் சந்திப்பில் பேசிய சீன வெளியுறவு அமைச்சகத்தின் செய்தித் தொடர்பாளர் குவோ ஜியாகுன், சீனா ஈரானுக்கு வான் பாதுகாப்பு அமைப்புகளை வழங்கப்போவதாகக் கூறப்படும் செய்திகள் முற்றிலுமாக “கற்பனையானவை” என்று மறுத்தார். அமெரிக்கா இத்தகைய பொய்யான காரணங்களைக் கூறி சீனப் பொருட்கள் மீது கூடுதல் வரி விதித்தால், சீனா நிச்சயமாகத் தீர்க்கமான ‘எதிர் நடவடிக்கைகளை’ (Countermeasures) எடுக்கும் என்று அவர் திட்டவட்டமாகத் தெரிவித்தார். ஈரான் – அமெரிக்கா இடையிலான மோதலில் சீனாவை இழுக்க முயற்சிப்பது முறையல்ல என்றும் அவர் சுட்டிக்காட்டினார்.

ஏற்கனவே ஈரான் மீதான முற்றுகையால் உலக எண்ணெய் சந்தையில் பாதிப்புகள் ஏற்பட்டுள்ள நிலையில், தற்போது உலகின் இரு பெரும் பொருளாதார நாடுகளான அமெரிக்கா மற்றும் சீனா இடையே மீண்டும் ஒரு ‘வர்த்தகப் போர்’ மூளும் அபாயம் உருவாகியுள்ளது. மே மாதம் அதிபர் டிரம்ப் சீனாவுக்குப் பயணம் மேற்கொள்ளவிருக்கும் நிலையில், இந்த மோதல் போக்கு சர்வதேச நாடுகளிடையே கவலையை ஏற்படுத்தியுள்ளது. ஈரானின் முக்கியப் பொருளாதாரப் பங்காளியாக இருக்கும் சீனா, அமெரிக்காவின் இந்த ஒருதலைப்பட்சமான பொருளாதாரத் தடைகள் மற்றும் வரி மிரட்டல்களைத் தொடர்ந்து எதிர்த்து வருகிறது.