“நடிகன் கட்சின்னு நக்கல் நையாண்டி பண்ணுறாங்க” நான் அவங்க ஸ்டைல்லயே பதில் சொல்றேன்… சட்டப்பேரவையில் முதல்வர் விஜய் மாஸ்…!

தமிழ்நாடு சட்டமன்றப் பேரவையில் இன்று உரையாற்றிய முதலமைச்சர் விஜய், த.வெ.க ஆட்சியை ‘நடிகன் கட்சி’ என நக்கல், நையாண்டி செய்பவர்களுக்கும், தங்களின் சினிமாப் பின்னணியை விமர்சிப்பவர்களுக்கும் மிகக் கடுமையான முறையில் பதிலடி கொடுத்துள்ளார். “நான் ஏதோ ஷூட்டிங்ல இருந்து நேரா வந்து சி.எம். ஆன மாதிரி சில பேர் சொல்றாங்க.. அவங்க ஸ்டைல்லயே பதில் சொல்றேன் – அது வெறும் ரீல் தான், ரியல் இல்ல” என்று அவர் அதிரடியாக முழங்கினார். மேலும், திராவிட இயக்கத்தின் முன்னோடியான தந்தை பெரியாரின் சமூக நீதி மற்றும் பகுத்தறிவுக் கொள்கைகளைத் த.வெ.க போற்றினாலும், அவரது கடவுள் மறுப்புக் கொள்கைகளில் தங்களுக்கு உடன்பாடு இல்லை என்பதையும் அவர் பேரவையில் வெளிப்படையாகத் தெளிவுபடுத்தியுள்ளார்.

கடந்த கால 50 ஆண்டு கால திராவிடக் கட்சிகளின் ஆட்சியின் முடிவில், தமிழகத்திற்குப் பெரும் நிதி நெருக்கடியையே பரிசாகத் தந்துவிட்டுச் சென்றுள்ளனர் என்று முந்தைய அரசுகளை அவர் சாடினார். அத்தகைய இக்கட்டான நிதிச் சூழலிலும், தற்போது அமைந்துள்ள த.வெ.க ஆட்சி என்பது சாமானிய மக்களுக்கான ஆட்சியாகத் திகழ்கிறது என்று பெருமிதம் தெரிவித்தார். தேர்தல்களில் காசு கொடுத்து ஓட்டு வாங்கும் நச்சு கலாச்சாரத்தைத் த.வெ.க முழுமையாக ஒழித்துக் கட்டியுள்ளதாகவும், யார் எவ்வளவு நக்கல், கிண்டல் செய்தாலும் அதைப் பற்றித் தனக்கு எவ்விதக் கவலையும் இல்லை என்றும் அவர் திட்டவட்டமாகக் குறிப்பிட்டுள்ளார்.

மாநிலத்தின் தற்போதைய கடுமையான நிதி நிலைமையைக் கருத்தில் கொண்டு, புதிய மக்கள் நலத்திட்டங்களை முழு வீச்சில் திட்டமிட்டுச் செயல்படுத்துவதற்குத் தங்களுக்குச் சற்று அவகாசம் தர வேண்டும் என்று தமிழக மக்களிடம் முதலமைச்சர் விஜய் கேட்டுக்கொண்டார். சட்டமன்றத்தில் ஆளுநர் உரைக்கு நன்றி தெரிவிக்கும் தீர்மானத்தின் மீது அவர் ஆற்றிய இந்த விரிவான, கொள்கை ரீதியான பதிலுரை தற்போதைய அரசியல் மற்றும் சமூக வலைத்தளங்களில் மிகப்பெரிய விவாதப் பொருளாக மாறியுள்ளது.