குழந்தை பெத்துக்கோங்க.. காசு வாங்கிக்கோங்க! சந்திரபாபு நாயுடு போட்ட மாஸ்டர் பிளான்.. வியப்பில் மக்கள்…!!

ஆந்திரப் பிரதேசத்தில் பிறப்பு விகிதம் குறைந்து வருவதைக் கருத்தில் கொண்டு, மக்கள் தொகையைச் சீராகப் பராமரிக்க முதல்வர் சந்திரபாபு நாயுடு ஒரு அதிரடியான புதிய மக்கள் தொகைக் கொள்கையை அறிவித்துள்ளார். இதன்படி, மாநிலத்தில் இரண்டாவது அல்லது மூன்றாவது குழந்தை பெற்றுக்கொள்ளும் தம்பதிகளுக்கு ரூ. 25,000 ஊக்கத்தொகை வழங்கப்படும் எனத் தெரிவிக்கப்பட்டுள்ளது. இந்தத் திட்டம் வரும் ஏப்ரல் 1, 2026 முதல் மாநிலம் முழுவதும் அமலுக்கு வர உள்ளது.

இந்த புதிய கொள்கையின் கீழ், நிதி உதவி மட்டுமல்லாது பல்வேறு கூடுதல் சலுகைகளும் அறிவிக்கப்பட்டுள்ளன. குறிப்பாக, மூன்றாவது குழந்தைக்கு 18 வயது வரை அரசுப் பள்ளிகள் மற்றும் விடுதிகளில் இலவசக் கல்வி வழங்கப்படும். மேலும், அந்தக் குழந்தைக்கு ஐந்து வயது ஆகும் வரை ஊட்டச்சத்தை உறுதி செய்ய மாதந்தோறும் ரூ. 1,000 நிதி உதவி வழங்கப்படும். அரசு ஊழியர்களுக்கு மூன்று குழந்தைகள் இருந்தால், அவர்கள் ஓய்வு பெறும்போது ரூ. 50,000 உடல்நல நிதியுடன் 15 நாட்கள் சிறப்பு விடுமுறையும் அளிக்கப்படும் என நாயுடு அறிவித்துள்ளார்.

மாநிலத்தின் மொத்த கருவுறுதல் விகிதம் (TFR) கடந்த 1993-ல் 3.0 ஆக இருந்த நிலையில், தற்போது 1.5 ஆகக் குறைந்துள்ளது. இது 2.1 என்ற சமநிலை அளவை விட மிகக் குறைவு என்பதால், எதிர்காலத்தில் இளைஞர்களின் எண்ணிக்கை குறைந்து முதியவர்களின் எண்ணிக்கை அதிகரிக்கும் அபாயம் இருப்பதாக முதல்வர் கவலை தெரிவித்துள்ளார். ஜப்பான் மற்றும் ஐரோப்பிய நாடுகளைப் போல முதியவர்கள் அதிகம் உள்ள மாநிலமாக ஆந்திரா மாறிவிடக்கூடாது என்பதற்காகவே இந்தத் திட்டம் கொண்டுவரப்பட்டுள்ளது.

பெண்களின் நலனை முன்னிறுத்தி ‘போஷணா-சிக்ஷா-சுரக்ஷா’ என்ற பெயரில் இந்தத் திட்டம் செயல்படுத்தப்பட உள்ளது. இதில் மூன்றாவது குழந்தை பிறக்கும்போது தாய்க்கு 12 மாத ஊதியத்துடன் கூடிய விடுமுறையும், தந்தைக்கு 2 மாத விடுமுறையும் வழங்கப்பட உள்ளது. அதிகக் குழந்தைகள் பெற்றுக்கொள்வதை ஊக்குவிப்பதன் மூலம் மாநிலத்தின் மனித வளத்தையும் பொருளாதார வளர்ச்சியையும் அடுத்த தலைமுறைக்குக் கொண்டு செல்ல முடியும் என அரசு நம்புகிறது. மார்ச் இறுதி வரை பொதுமக்களிடம் இது குறித்துக் கருத்துகள் கேட்கப்பட்டுத் திட்டம் இறுதி செய்யப்படும்.