இன்னும் ஏன் வெயிட் பண்றீங்க?… ரூ.1000 இருந்தால் போதும்… உங்கள் வருமானத்தை டபுள் ஆக்க சூப்பர் பிளான்…!

மத்திய அரசால் செயல்படுத்தப்பட்டு வரும் ‘கிசான் விகாஸ் பத்ரா’ திட்டம், பாதுகாப்பான மற்றும் நிலையான வருமானத்தை விரும்பும் முதலீட்டாளர்களுக்கு ஒரு சிறந்த தேர்வாக விளங்கி வருகிறது. நடப்பு 2026-27 நிதியாண்டின் ஜூலை முதல் செப்டம்பர் வரையிலான இரண்டாவது காலாண்டிலும், இத்திட்டத்திற்கான வட்டி விகிதம் 7.5 சதவீதமாகவே தொடரும் என்று மத்திய நிதியமைச்சகம் அறிவித்துள்ளது. சந்தை ஏற்ற இறக்கங்கள் இருந்தாலும், இந்த வட்டி விகிதம் மாறாமல் நீடிப்பது முதலீட்டாளர்களுக்குப் பெரும் பாதுகாப்பை அளிக்கிறது. தற்போதுள்ள 7.5% வட்டி விகிதத்தின்படி, இதில் முதலீடு செய்யப்படும் தொகை சரியாக 115 மாதங்களில், முழுமையாக இரட்டிப்பாகி விடுகிறது.

இத்திட்டத்தின் கீழ் நாட்டின் எந்தவொரு குடிமகனும் அஞ்சல் நிலையங்கள் மூலம் எளிதாகப் பயனடைய முடியும். வயது வந்த தனிநபர் ஒருவர் தனது பெயரிலோ அல்லது மூன்று பேர் வரை இணைந்து கூட்டுக் கணக்கைத் (Joint Account) தொடங்கலாம். மேலும், பெற்றோர் அல்லது பாதுகாவலர்கள் தங்களின் மைனர் குழந்தைகள் அல்லது மனநலம் பாதிக்கப்பட்டவர்களின் சார்பாகவும் முதலீடு செய்ய முடியும். 10 வயதுக்கு மேற்பட்ட மைனர் குழந்தைகள் தங்களின் சொந்தப் பெயரிலேயே இக்கணக்கைத் தொடங்கி நிர்வகிக்க அனுமதிக்கப்படுகிறார்கள் என்பது இத்திட்டத்தின் கூடுதல் சிறப்பம்சமாகும்.

இந்திய அஞ்சல் துறையால் கடந்த 1988ஆம் ஆண்டு தொடங்கப்பட்ட இத்திட்டம், ஆரம்பத்தில் விவசாயிகளின் நீண்ட கால சேமிப்பை ஊக்குவிப்பதற்காக உருவாக்கப்பட்டது. அதனால்தான் இதற்கு ‘கிசான்’ என்று பெயரிடப்பட்டது. எனினும், காலப்போக்கில் நாட்டின் அனைத்து தரப்பு முதலீட்டாளர்களுக்கும் இது விரிவுபடுத்தப்பட்டது. இத்திட்டத்தில் குறைந்தபட்ச முதலீடாக 1,000 ரூபாயிலிருந்து கணக்கைத் தொடங்கலாம்; அதிகபட்ச வரம்பு எதுவும் இல்லை என்பதால் நீங்கள் விரும்பும் தொகையை முதலீடு செய்யலாம். ஆனால், இத்திட்டத்தின் மூலம் ஈட்டப்படும் வட்டித் தொகைக்கு முழுமையாக வரி விதிக்கப்படும் என்பதால், முதலீட்டாளர்கள் தங்களின் வரி வரம்பிற்கு ஏற்ப வரியைச் செலுத்த வேண்டும்.

முறைகேடான பணப் பரிவர்த்தனைகளைத் தடுக்கும் பொருட்டு, இத்திட்டத்தில் முதலீடு செய்வதற்கு அரசு சில கடுமையான விதிமுறைகளை வகுத்துள்ளது. அதன்படி, 50,000 ரூபாய்க்கு மேல் முதலீடு செய்ய விரும்புவோர் தங்களின் பான் கார்டைச் சமர்ப்பிப்பது கட்டாயமாகும். அதேபோல, 10 லட்சம் ரூபாய் அல்லது அதற்கு மேற்பட்ட தொகையை முதலீடு செய்வோர், தங்களின் வருமான ஆதாரத்திற்கான ஆவணங்களை சமர்ப்பிக்க வேண்டும். மேலும், கணக்கைத் தொடங்குவதற்கான அடையாளச் சான்றாக அரசு அங்கீகரித்த KYC ஆவணங்களை வழங்குவதும் அவசியமாகும்.

தபால் நிலையங்களில் கிசான் விகாஸ் பத்ரா கணக்கைத் தொடங்குவது மிகவும் எளிமையான ஒரு நடைமுறையாகும். முதலீட்டாளர்கள் அஞ்சல் அலுவலகத்திலிருந்து ‘படிவம் A’-ஐப் பெற்று அல்லது இணையத்திலிருந்து பதிவிறக்கம் செய்து பூர்த்தி செய்ய வேண்டும். அதனுடன் அடையாள மற்றும் முகவரிச் சான்றுகளுக்கான நகல்களை இணைத்து, ரொக்கம், காசோலை அல்லது டிமாண்ட் டிராஃப்ட் மூலம் முதலீட்டுத் தொகையைச் செலுத்தலாம். ஆவணங்கள் சரிபார்க்கப்பட்ட பின் வழங்கப்படும் சான்றிதழில் முதிர்வு விவரங்கள் இடம்பெறும். இத்திட்டத்தில் வாரிசுதாரரை நியமிக்கும் வசதியும் உள்ளதால், எதிர்பாராத சூழல்களிலும் முதலீட்டுத் தொகை பாதுகாப்பாகப் பரிமாறப்படும்.