என்ன நடந்தது அந்த இரவில்..? சர்மா மரண வழக்கை.. மீண்டும் ரீக்ரியேட் செய்யும் சிபிஐ..! திடுக்கிடும் பின்னணி..!

நடிகையும் கார்ப்பரேட் அதிகாரியுமான ட்விஷா சர்மா கடந்த மே 12 அன்று போபாலில் உள்ள அவரது கணவர் வீட்டில் மர்மமான முறையில் தூக்கில் தொங்கிய நிலையில் சடலமாகக் கண்டெடுக்கப்பட்டார். இந்த மரணத்தில் அவரது கணவர் சமர்த் சிங் (வழக்கறிஞர்) மற்றும் மாமியார் கிரிபாலா சிங் (ஓய்வு பெற்ற மாவட்ட நீதிபதி) ஆகியோருக்குத் தொடர்பு இருப்பதாகக் கூறி, ட்விஷாவின் பெற்றோர் வரதட்சணை கொடுமை மற்றும் கொலைக் குற்றச்சாட்டுகளை முன்வைத்தனர். குற்றம் சாட்டப்பட்டவர்கள் சட்டப் பின்புலம் கொண்டவர்கள் என்பதால், உள்ளூர் காவல்துறையின் விசாரணையில் பாரபட்சம் இருப்பதாக எழுந்த புகாரை அடுத்து, உச்ச நீதிமன்றம் இந்த வழக்கை சுயமாக முன்வந்து (Suo Motu) விசாரணைக்கு எடுத்துக்கொண்டு, வழக்கின் விசாரணையை மத்திய புலனாய்வு அமைப்பிற்கு (CBI) மாற்ற உத்தரவிட்டது.

வழக்கை அதிகாரப்பூர்வமாகக் கையில் எடுத்த சிபிஐ சிறப்புப் பிரிவு, பாரதிய நியாய சன்ஹிதா (BNS) மற்றும் வரதட்சணை தடுப்புச் சட்டத்தின் கீழ் புதிய எஃப்ஐஆர் (FIR) பதிவு செய்து விசாரணையைத் தீவிரப்படுத்தியுள்ளது. இதன் ஒரு பகுதியாக, ட்விஷா சர்மா மரணமடைந்த அன்று இரவு என்ன நடந்தது என்பதைத் துல்லியமாகக் கண்டறிய, போபாலில் உள்ள அவரது மாமியார் வீட்டிற்கு சிபிஐ அதிகாரிகள் நேரில் சென்றனர். அங்கு குற்றம் சாட்டப்பட்ட கணவர் மற்றும் மாமியாரை முன்னிலைப் படுத்தி, மே 12 அன்று இரவு நடந்த சம்பவங்களை மீண்டும் செய்து காட்டும் “குற்றக் காட்சி மறுஉருவாக்கத்தை” (Crime Scene Recreation) சிபிஐ அதிகாரிகள் மேற்கொண்டனர்.

மேலும், இந்த மர்ம மரணத்தின் பின்னணியில் உள்ள உண்மைகளைக் கண்டறிய தடைய அறிவியல் சான்றுகள், வீட்டின் சிசிடிவி (CCTV) காட்சிகள் மற்றும் தொலைபேசி அழைப்பு விவரங்களை சிபிஐ ஆய்வு செய்து வருகிறது. ட்விஷாவின் கணவர் சமர்த் சிங் தற்போது போலீஸ் காவலில் உள்ள நிலையில், டெல்லி எய்ம்ஸ் (AIIMS) மருத்துவக் குழுவின் இரண்டாவது பிரேதப் பரிசோதனை அறிக்கை மற்றும் மருத்துவ ஆவணங்களின் அடிப்படையில் விசாரணை அடுத்த கட்டத்தை நோக்கி நகர்கிறது. இதற்கிடையில், இந்த வழக்கை பொதுமக்களும் ஊடகங்களும் ஊகங்களின் அடிப்படையில் விவாதிக்க வேண்டாம் என்றும், சிபிஐ நேர்மையான முறையில் உண்மையை வெளிக்கொண்டு வரும் என்றும் உச்ச நீதிமன்றம் தெரிவித்துள்ளது.