BREAKING: பள்ளி முடிந்து வீடு திரும்பிய 4 மாணவர்கள் மீது கார் மோதி பலி… தமிழகத்தில் அதிர்ச்சி..!!

திருவாரூர் மாவட்டம் மன்னார்குடி அருகே காரக்கோட்டை பகுதியில் அரசுப் பள்ளி முடிந்து மாலை நேரத்தில் வீடுகளுக்கு நடந்து திரும்பிக் கொண்டிருந்த 12, 13 வயதுடைய மாணவர்கள் மீது அதிவேகமாக வந்த கார் ஒன்று எதிர்பாராதவிதமாக மோதி கோர விபத்து ஏற்பட்டுள்ளது. இந்த மிக மோசமான விபத்தின் தாக்கத்தால் லோகேஷ் (12), ரக்ஷித் (13) உட்பட 4 பள்ளி மாணவர்கள் சம்பவ இடத்திலேயே பரிதாபமாக உயிரிழந்தனர். பள்ளிக்குச் சென்று பாதுகாப்பாக வீடு திரும்புவார்கள் என்று எதிர்பார்த்திருந்த நிலையில், பிஞ்சுயிர்கள் சாலையோரத்திலேயே துடிதுடித்து பலியான இக்கோரச் சம்பவம் அப்பகுதி மக்களிடையே மட்டற்ற அதிர்ச்சியையும், எல்லையற்ற சோகத்தையும் ஏற்படுத்தியுள்ளது.

இந்த விபத்து குறித்து தகவல் அறிந்தவுடன் மன்னார்குடி காவல்துறையினர் சம்பவ இடத்திற்கு விரைந்து வந்து மீட்புப் பணிகளில் ஈடுபட்டனர். உயிரிழந்த நான்கு மாணவர்களின் உடல்களையும் மீட்ட போலீசார், பிரேத பரிசோதனைக்காக அருகில் உள்ள அரசு மருத்துவமனைக்கு அனுப்பி வைத்துள்ளனர். மேலும், விபத்தை ஏற்படுத்திவிட்டு தப்பியோடிய கார் ஓட்டுநர் யார் என்பது குறித்தும், விபத்துக்கான துல்லியமான காரணம் குறித்தும் காவல்துறையினர் வழக்குப்பதிவு செய்து தீவிர விசாரணை மேற்கொண்டு வருகின்றனர்.