18 தொகுதிகளுக்கும் வேட்பாளர்கள் ரெடி.. முழு வீச்சில் இறங்கிய அன்புமணி… யார்? எங்கு? போட்டி… இதோ லிஸ்ட்… மிரளும் அரசியல் களம்…!!

தமிழகத்தில் 2026 சட்டமன்றத் தேர்தலை முன்னிட்டு அதிமுக கூட்டணியில் இடம்பெற்றுள்ள பாட்டாளி மக்கள் கட்சி (பாமக), தங்களுக்கு ஒதுக்கப்பட்ட 18 தொகுதிகளுக்கான முழுமையான வேட்பாளர் பட்டியலை வெளியிட்டுள்ளது. ஏற்கனவே முதற்கட்டமாக கீழ்வேளூர், அம்பத்தூர் மற்றும் செஞ்சி ஆகிய 3 தொகுதிகளுக்கு வேட்பாளர்கள் அறிவிக்கப்பட்ட நிலையில், தற்போது மீதமுள்ள 15 தொகுதிகளுக்கான பட்டியலை அக்கட்சியின் தலைவர் அன்புமணி ராமதாஸ் வெளியிட்டுள்ளார். இதன் மூலம் பாமக களம் காணும் அனைத்து தொகுதிகளுக்கான வேட்பாளர் விபரங்களும் உறுதி செய்யப்பட்டுள்ளன.

இந்த இரண்டாம் கட்டப் பட்டியலில் கட்சியின் முக்கிய முகங்கள் பலருக்கு வாய்ப்பு அளிக்கப்பட்டுள்ளது. குறிப்பாக, தருமபுரி தொகுதியில் சௌமியா அன்புமணி, பெரம்பூர் தொகுதியில் மாநில பொருளாளர் திலகபாமா மற்றும் விருதாச்சலம் தொகுதியில் தமிழரசி ஆதிமூலம் ஆகியோர் களமிறக்கப்பட்டுள்ளனர். மேலும் திருப்போரூர் தொகுதியில் வழக்கறிஞர் கே. பாலு, ஜெயங்கொண்டம் தொகுதியில் வைத்தி, மற்றும் சேலம் வடக்கு தொகுதியில் சதாசிவம் போன்ற அனுபவம் வாய்ந்த நிர்வாகிகள் வேட்பாளர்களாக அறிவிக்கப்பட்டுள்ளனர்.

பென்னாகரம், போளூர், விக்கிரவாண்டி, சோளிங்கர், மயிலாடுதுறை உள்ளிட்ட பாமகவின் செல்வாக்கு மிகுந்த வட மாவட்டத் தொகுதிகளிலும் வலுவான வேட்பாளர்கள் நிறுத்தப்பட்டுள்ளனர். சென்னை பெரம்பூர் தொகுதியில் தவெக தலைவர் விஜய் போட்டியிடுவதால், அங்கு பாமக சார்பில் திலகபாமா களம் காண்பது அந்தத் தொகுதியை நட்சத்திரத் தொகுதியாக மாற்றியுள்ளது. அதிமுக கூட்டணியின் பலத்துடன், பாமக தனது கோட்டைகளைத் தக்கவைக்கவும் புதிய தொகுதிகளில் வெற்றி பெறவும் இந்த வேட்பாளர்கள் மூலம் தீவிரமாகப் பணியாற்றி வருகிறது.