ஷாக்… கனிமவளக் கொள்ளையைத் தட்டிக்கேட்ட… வழக்கறிஞர் மீது கொடூரத் தாக்குதல்… சிவகங்கையில் நடந்த அதிர்ச்சி சம்பவம்… அரசின் மௌனத்தைக் கிழித்தெறிந்த நாதக சீமான்…!!

சிவகங்கை மாவட்டம் ஜெயங்கொண்டான் நிலையைச் சேர்ந்த உயர் நீதிமன்ற வழக்கறிஞரும், நாம் தமிழர் கட்சியின் நிர்வாகியுமான வேலாயுதம் என்பவர் மீது சமூக விரோதிகள் கொலைவெறித் தாக்குதல் நடத்தியுள்ளனர். தகவல் அறியும் உரிமைச் சட்டத்தின் கீழ் அரசு நிர்வாகத்தில் நடைபெறும் ஊழல்களையும் கனிமவளக் கொள்ளையையும் துணிவுடன் வெளிக்கொணர்ந்து போராடி வந்த வேலாயுதம், இத்தாக்குதலில் படுகாயமடைந்து தீவிர சிகிச்சைப் பிரிவில் அனுமதிக்கப்பட்டுள்ளார். இச்சம்பவம் மிகுந்த அதிர்ச்சியையும் மனவேதனையையும் அளிப்பதாக நாம் தமிழர் கட்சியின் தலைமை ஒருங்கிணைப்பாளர் சீமான் தெரிவித்துள்ளார்.

சமூக ஆர்வலர்கள் மற்றும் மண்ணுரிமைப் போராளிகள் மீது அடுத்தடுத்து நடத்தப்படும் இத்தகைய கொலைவெறித் தாக்குதல்களைத் தடுக்கத் தவறி வேடிக்கைப் பார்க்கும் அரசின் செயலற்ற தன்மையைக் கண்டித்துள்ள சீமான், இது மாநிலத்தில் சட்டம்-ஒழுங்கு சீரழிவின் உச்சம் எனக் விமர்சித்துள்ளார். மணற்கொள்ளை, கனிமவளக் கொள்ளை மற்றும் ஊழல்களுக்கு எதிராகச் சட்டப்போராட்டம் நடத்தும் சமூக ஆர்வலர்களுக்கே பாதுகாப்பு இல்லையென்றால், சாமானிய மக்களின் நிலை என்னவாகும் என்றும் அவர் கேள்வி எழுப்பியுள்ளார்.

எனவே, வேலாயுதம் மீது தாக்குதல் நடத்திய குற்றவாளிகள் அனைவரையும் விரைந்து கைது செய்து, சட்டப்படி கடும் தண்டனை பெற்றுத்தர வேண்டும் என அவர் வலியுறுத்தியுள்ளார். மேலும், இதுபோன்ற தாக்குதல்கள் இனி நிகழாமல் தடுக்கவும், சமூக நலனுக்காகப் போராடும் சமூக ஆர்வலர்களின் பாதுகாப்பை உறுதி செய்யவும் வரவிருக்கும் சட்டமன்றக் கூட்டத்தொடரிலேயே தமிழ்நாடு அரசு “சமூக ஆர்வலர்கள் பாதுகாப்புத் தனிச்சட்டம்” நிறைவேற்ற வேண்டும் என்றும் சீமான் கேட்டுக்கொண்டுள்ளார்.