சாப்பிடும் பிஸ்கட்டில் கால்நடைத் தீவனமா?…. உலர் திராட்சையில் கொடூர நச்சுப் பூச்சிக்கொல்லியா?… மக்களின் உயிரோடு விளையாடும் பிரபல நிறுவனங்களின் பகீர் முகமூடி கிழிப்பு….!

உணவுப் பொருட்களின் தரம் மற்றும் பாதுகாப்பு குறித்த கேள்விகள் மீண்டும் தலைதூக்கியுள்ளன. அண்மையில் உணவுப் பாதுகாப்புத் துறையினர் நடத்திய அதிரடிச் சோதனைகளில், பிரபல உணவுப் பொருட்களான பால், பிஸ்கட் மற்றும் உலர் திராட்சை ஆகியவற்றில் பல்வேறு கடுமையான விதிமீறல்களும் குறைபாடுகளும் கண்டறியப்பட்டுள்ளன. டோட்லா டெய்ரி, பிரியாகோல்டு பிஸ்கட் தயாரிக்கும் சூர்யா ஃபுட் & அக்ரோ மற்றும் யூயர் ஆர்கானிக் ஃபுட்ஸ் உள்ளிட்ட முக்கிய நிறுவனங்கள் இந்தச் சோதனைகளில் சிக்கியுள்ளன.

குறிப்பாக, பிரியாகோல்டு பிஸ்கட் தயாரிக்கும் சூர்யா ஃபுட் & அக்ரோ நிறுவனத்தில் நடத்தப்பட்ட ஆய்வில், கால்நடைத் தீவனம் என முத்திரையிடப்பட்ட தவிடு மூலப்பொருளாகப் பயன்படுத்தப்பட்டது அம்பலமானது. மேலும், தொழிற்சாலைத் தூய்மை, பூச்சிக் கட்டுப்பாடு மற்றும் பணியாளர் சுகாதாரம் போன்ற அடிப்படைக் காரியங்களிலும் கடுமையான குறைபாடுகள் கண்டறியப்பட்டதை அடுத்து, அந்நிறுவனத்தின் உணவு உரிமம் தற்காலிகமாக இடைநீக்கம் செய்யப்பட்டுள்ளது.

இதற்கிடையில், டோட்லா பால் பண்ணையின் முழு கொழுப்புள்ள பால் மாதிரிகள் மீது நடத்தப்பட்ட ஆய்வுகள் அதிர்ச்சியை ஏற்படுத்தியுள்ளன. ஆரம்பகட்ட மற்றும் மேலதிகப் பரிசோதனைகளில், பாலில் கொழுப்பின் அளவு பரிந்துரைக்கப்பட்ட தரத்தை விடக் குறைவாக இருப்பதுடன், டிடர்ஜென்ட் மற்றும் காஸ்டிக் சோடா போன்ற ஆபத்தான வேதிப்பொருட்களின் கலப்பு இருப்பதும் உறுதியானது. இதனால் நுகர்வோரின் பாதுகாப்பைக் கருத்திற்கொண்டு அந்நிறுவனத்தின் மீது கடுமையான சட்ட நடவடிக்கை எடுக்க அனுமதி வழங்கப்பட்டுள்ளது.

மறுபுறம், யூயர் ஆர்கானிக் ஃபுட்ஸ் நிறுவனத்திடமிருந்து பெறப்பட்ட இயற்கை மஞ்சள் உலர் திராட்சை மாதிரிகளில், அனுமதிக்கப்பட்ட வரம்பையும் தாண்டி பூச்சிக்கொல்லி எச்சங்கள் மற்றும் நச்சு இரசாயனங்களின் செறிவு இருப்பது சோதனைகள் மூலம் கண்டறியப்பட்டுள்ளது. மக்களின் உடல்நலனைப் பாதிக்கும் இத்தகைய மோசமான தரம் மற்றும் முறைகேடுகள் குறித்து சம்பந்தப்பட்ட நிறுவனங்கள் மீது சட்ட நடவடிக்கைகள் எடுக்கப்பட்டு வருவதோடு, பல உணவு வணிக நிறுவனங்களுக்கும் உரிய எச்சரிக்கை அறிவிப்புகள் அனுப்பப்பட்டுள்ளன.