அதிர்ச்சி… அமெரிக்காவுக்கு மீண்டும் எச்சரிக்கை?… ட்ரம்ப்புக்கு ஈரான் அதிபர் பெஷெஷ்கியான் எடுத்த அதிரடி முடிவு…!

ஈரான் அதிபர் மசூத் பெஷெஷ்கியான், அமெரிக்காவுடனான போர் முடிவுக்கு வர வாய்ப்புள்ளதாகத் தெரிவித்துள்ளார். இருப்பினும், ஈரானின் மீது மீண்டும் தாக்குதல் நடத்தப்படாது என்ற உத்தரவாதமும், அமெரிக்க அதிபர் டொனால்ட் டிரம்ப்பின் முழு ஆதரவும் இதற்குத் தேவை என்று அவர் நிபந்தனை விதித்துள்ளார். அமெரிக்கா நம்பிக்கையான சூழலைப் பேணி, புரிந்துணர்வு ஒப்பந்தத்தின்படி தனது கடமைகளை நிறைவேற்றினால், ஈரானும் அமைதிப் பாதையில் தொடர்ந்து பயணிக்கும் என்று அவர் கூறியுள்ளார்.

நாட்டில் நிலவும் ஒற்றுமை மற்றும் வலிமை காரணமாக உடன்பாட்டை எட்டுவதற்கு இதுவே சிறந்த தருணம் என்று பெஷெஷ்கியான் சுட்டிக்காட்டினார். ஈரான் அமைதியை விரும்பினாலும், பலத்தைப் பயன்படுத்தித் தன்னைப் பணிய வைக்க நினைத்தால் அதை ஒருபோதும் ஏற்றுக்கொள்ளாது என்றும், தாக்கப்பட்டால் கடுமையான பதிலடி கொடுக்கப்படும் என்றும் அமெரிக்காவை எச்சரித்துள்ளார். மேலும், ஈரானின் அனைத்து நடவடிக்கைகளுக்கும் அதன் உச்ச தலைவர் மொஜ்தபா கமேனியின் முடிவுகளே இறுதி அடிப்படையாக இருக்கும் என்றும் அவர் தெளிவுபடுத்தியுள்ளார்.

சமீபத்திய பேட்டியில், அமெரிக்காவுடனான பேச்சுவார்த்தை மற்றும் புரிந்துணர்வு ஒப்பந்தத்திற்கு அரசு எடுத்த முடிவை அவர் ஆதரித்துப் பேசினார். எதிர்த்தரப்பு தனது உறுதிமொழிகளை நிறைவேற்றத் தவறினால் ஈரானும் ஒப்பந்தத்தைக் கடைப்பிடிக்க வேண்டிய அவசியமில்லை என்று அவர் குறிப்பிட்டார். ஒப்பந்தம் தொடர்பாக ஈரானிய தலைமைக்குள் கருத்து வேறுபாடுகள் நிலவுவதாகவும், தாம் பதவி விலகப்போவதாகவும் பரவிய வதந்திகளை மறுத்த பெஷெஷ்கியான், நாட்டின் உரிமைகளைப் பாதுகாத்துத் தனது பணிகளைத் தொடர்ந்து செய்யப்போவதாக உறுதிபடத் தெரிவித்துள்ளார்.