“மோடி விசிட் முடிஞ்ச 3 நாள்ல வந்த ஷாக்”…. எல்.முருகனின் ராஜினாமா பின்னணியில் இருக்கும் ரகசியம்…. டெல்லி மேலிடம் எடுத்த அதிரடி முடிவு…!

மத்திய அமைச்சரவையில் தமிழ்நாட்டின் பிரதிநிதியாக இருந்து வந்த எல்.முருகன் தனது அமைச்சர் பதவியையும், மாநிலங்களவை உறுப்பினர் பதவியையும் ஒரே நேரத்தில் ராஜினாமா செய்தது அரசியல் வட்டாரத்தில் பெரும் பரபரப்பை ஏற்படுத்தியுள்ளது. 2029 நாடாளுமன்ற தேர்தலுக்காக கட்சியை வலுப்படுத்தும் பணியில் ஈடுபடப்போவதாக அவர் விளக்கம் அளித்துள்ள போதிலும், இதற்குப் பின்னால் பல அதிருப்தி காரணங்கள் இருப்பதாக தகவல்கள் வெளியாகி உள்ளன.

கடந்த ஐந்து ஆண்டுகளாக மத்திய இணையமைச்சராகப் பதவியில் இருந்த எல்.முருகனின் செயல்பாடுகள் பிரதமர் அலுவலகத்தின் ஆய்வில் திருப்திகரமாக இல்லை எனக் கூறப்படுகிறது. குறிப்பாக, தமிழ்நாட்டிற்கு அவரது துறை வாயிலாகக் கொண்டுவரப்பட்ட திட்டங்கள் மிகவும் குறைவாகவே இருந்ததும், மாநிலத் தேர்தல் களத்தில் உரிய தொகுதிகளைப் பெறத் தவறியதும் டெல்லி மேலிடத்திற்குப் பெருத்த ஏமாற்றத்தை அளித்துள்ளது.

இவற்றுடன், டெல்லியில் அவரது உதவியாளராகப் பணியாற்றியவர் தொடர்பான சில சர்ச்சைகளும், பிரதமர் மோடியின் சென்னை வருகையின்போது நிகழ்ந்த பாதுகாப்பு நெறிமுறை மீறல்களும் விவகாரத்தை மேலும் தீவிரமாக்கியுள்ளன. உடனடியாகப் பதவியை ராஜினாமா செய்யும்படி டெல்லி தலைமை வலியுறுத்தியதைத் தொடர்ந்தே இந்த அதிரடி நீக்கம் அரங்கேறியுள்ளதாகக் கமலாலய வட்டாரங்கள் தெரிவிக்கின்றன.

கட்சியை வலுப்படுத்தப் போவதாக எல்.முருகன் தனது கடிதத்தில் குறிப்பிட்டுள்ள போதிலும், தற்போதைய சூழலில் அவருக்கு மீண்டும் அரசியலில் கம்பேக் கொடுப்பது எளிதான காரியமாக இருக்காது என்றே அரசியல் பார்வையாளர்கள் கருதுகின்றனர். இந்தத் திடீர் திருப்பம் தமிழக பாஜக அரசியலில் பெரும் தாக்கத்தை ஏற்படுத்தியுள்ளது.