“ரிசார்ட்டில் ஜாலியாக உல்லாசம்.. ரூ.6 கோடி சுருட்டிய விவகாரம்”…. எக்ஸ் தளவாசிகளால் சிக்கிய 3 கல்லூரி நண்பர்கள்… சைபர் கிரைம் போலீசாரின் அதிரடி வேட்டை….!

சமூக வலைதளங்களில் ஆன்லைன் டிரேடிங் மூலம் பல லட்சம் ரூபாய் லாபம் ஈட்டியதாகப் போலியான வீடியோக்களை வெளியிட்டு, பொதுமக்களை ஏமாற்றி வந்த கும்பலை ஆவடி சைபர் கிரைம் போலீசார் அதிரடியாகக் கைது செய்துள்ளனர். சென்னை திருவேற்காடு பகுதியைச் சேர்ந்த கவின் பிரசாத், கீர்த்திவாசன் மற்றும் பார்த்திபன் ஆகிய 24 வயதுடைய மூன்று கல்லூரி நண்பர்கள் இந்த மோசடியில் ஈடுபட்டுள்ளனர். இன்ஸ்டாகிராம் போன்ற தளங்களில் கவர்ச்சிகரமான விளம்பரங்களை வெளியிட்டு, பயிற்சி வகுப்புகளுக்குத் தலா ரூ.40,000 கட்டணம் வசூலித்து சுமார் ரூ.6 கோடி வரை இவர்கள் மோசடி செய்துள்ளதாகப் புகார்கள் எழுந்துள்ளன.

இந்த மோசடி கும்பல் கோவளம், முட்டுக்காடு, கொடைக்கானல் மற்றும் புதுச்சேரி உள்ளிட்ட பல்வேறு சுற்றுலாத் தலங்களில் உள்ள ரிசார்ட்டுகளை வார கணக்கில் வாடகைக்கு எடுத்து, அங்கு மாணவர்களைத் தங்க வைத்து ஆன்லைன் டிரேடிங் பயிற்சி அளித்துள்ளனர். பயிற்சிக்கு வந்த மாணவர்களைக் கொண்டே அதிக லாபம் கிடைத்தது போல் போலியாக நடிக்க வைத்து வீடியோக்களை வெளியிட்டுள்ளனர். மேலும், கிரிப்டோகரன்சி முதலீடுகளுக்காகச் சட்டவிரோதமான பணப் பரிமாற்ற வழிகளைப் பயன்படுத்தியதும் விசாரணையில் தெரியவந்துள்ளது.

இவர்களின் இந்தச் செயல்கள் குறித்து எக்ஸ் (ட்விட்டர்) தளத்தில் கடுமையான விவாதங்கள் வெடித்தன. நெட்டிசன்கள் இவர்களின் முறைகேடுகளை ஆதாரங்களுடன் அம்பலப்படுத்தியதைத் தொடர்ந்து, இந்த விவகாரம் காவல்துறை அதிகாரிகளின் கவனத்திற்குச் சென்றது. இதனையடுத்து, தீவிர விசாரணை மேற்கொண்ட ஆவடி சைபர் கிரைம் போலீசார், பொதுமக்களை ஏமாற்றி கோடிகளில் சுருட்டிய இந்த மூன்று பேரையும் தற்போது கைது செய்து சிறையில் அடைத்துள்ளனர்.

சமூக வலைதளங்களில் வெளியாகும் நம்பகத்தன்மையற்ற மற்றும் அதீத லாபம் தரும் கவர்ச்சிகரமான விளம்பரங்களை நம்பி பொதுமக்கள் யாரும் ஏமாற வேண்டாம் என்று சைபர் கிரைம் போலீசார் தொடர்ந்து எச்சரித்து வருகின்றனர். ஆன்லைன் முதலீடுகள் மற்றும் பயிற்சி வகுப்புகளைத் தேர்ந்தெடுக்கும் போது உரிய விழிப்புணர்வுடன் இருக்க வேண்டும் என்பதை இந்தச் சம்பவம் மீண்டும் ஒருமுறை உறுதிப்படுத்தியுள்ளது.