திமுக முன்னாள் அமைச்சர்களுக்கு அர்ஜுன் சம்பத் விடுத்த பகிரங்க சவால்… தமிழக அரசியலில் திடீர் பரபரப்பு…!

சிவகங்கை மாவட்டம் காரைக்குடியில் செய்தியாளர்களைச் சந்தித்த இந்து மக்கள் கட்சித் தலைவர் அர்ஜுன் சம்பத், தமிழக அரசியல் சூழல் மற்றும் ஊழல் குற்றச்சாட்டுகள் குறித்து மிகக் கடுமையான விமர்சனங்களை முன்வைத்தார். லஞ்ச, ஊழல் ஒழிப்புத்துறை நடவடிக்கைகளைத் தான் வரவேற்பதாகக் குறிப்பிட்ட அவர், ஊழல் வழக்குகளில் சிக்கியுள்ள திமுக முன்னாள் அமைச்சர்கள் சட்டத்திற்கும் நீதிமன்றத்திற்கும் அஞ்சி ஓடி ஒளியக் கூடாது என்றும், தங்களின் நேர்மையை நீதிமன்றத்தில் தான் நிரூபிக்க வேண்டும் என்றும் வலியுறுத்தினார். மேலும், முன்னாள் அமைச்சர் செந்தில் பாலாஜி நேர்மையானவராக இருந்தால் அவராகவே முன்வந்து சரணடைய வேண்டும் என்றும், சாலை அமைப்பதில் ஊழல் செய்த எ.வ.வேலு தப்பியோடி சிங்கப்பூர் மருத்துவமனையில் படுத்துக் கொண்டார் என்றும், முதல்வர் மு.க.ஸ்டாலின் கூட பயத்தின் காரணமாகவே தற்போது லண்டன் சென்றுள்ளார் எனத் தான் நினைப்பதாகவும் அர்ஜுன் சம்பத் அடுக்கடுக்கான குற்றச்சாட்டுகளைச் சுமத்தினார்.

தமிழகத்தின் மதுவிலக்கு மற்றும் புதிய அரசியல் மாற்றங்கள் குறித்தும் பேசிய அவர், மாநிலத்தில் போதையை ஒழிக்க வேண்டுமானால் முதலில் அரசு மதுக்கடைகளை மூட வேண்டும் என்று கேட்டுக்கொண்டார். திமுக மற்றும் அதிமுகவைச் சேர்ந்தவர்கள் தான் இங்கு பெரும்பாலான சாராய ஆலைகளை நடத்துவதாகவும், தமிழக வெற்றிக் கழகத் தலைவர் விஜய்க்கு அப்படிப்பட்ட பின்னணி இல்லாததால் அவரால் மதுக்கடைகளைத் தைரியமாக மூட முடியும் என்றும் நம்பிக்கை தெரிவித்தார். எனினும், தற்போதைய சூழலில் பிற கட்சியினர் தங்களின் ஊழல் பணத்தைக் காப்பாற்றிக் கொள்ளும் நோக்கிலேயே தவெக-வில் இணைந்து வருகிறார்களே தவிர, விஜய்யின் கொள்கை பிடித்துப் போகவில்லை என்றும், இதுபோன்ற சுயநலப் போக்குகளை விஜய் ஊக்குவிக்கக் கூடாது என்றும் அவர் எச்சரித்தார்.

தொடர்ந்து பேசிய அர்ஜுன் சம்பத், ஆளுநர் மற்றும் மத்திய அரசுடன் திமுக அரசு திட்டமிட்டு மோதல் போக்கை உருவாக்குவதாகவும், அதற்கு தவெக துணைபோகாமல் மத்திய அரசுடன் ஒத்துழைத்து தமிழகத்திற்கு நல்ல திட்டங்களைக் கொண்டு வர முயல வேண்டும் என்றும் அறிவுறுத்தினார். இந்துக்களையும் பிரதமர் மோடியையும் அவதூறாகப் பேசுவோர் மீது அரசு கடுமையான நடவடிக்கை எடுத்து அவர்களைக் கைது செய்ய வேண்டும் என்றும், திமுகவைப் போலன்றி அனைத்து மதப் பண்டிகைகளுக்கும் சமமாக வாழ்த்து தெரிவிக்க வேண்டும் என்றும் வலியுறுத்தினார். இறுதியாக, கரூரில் ஏற்பட்ட கூட்ட நெரிசலில் உயிரிழந்த 41 பேரின் குடும்பத்தினருக்கு அரசு வேலை வழங்குவது அதிகாரத்தைத் தவறாகப் பயன்படுத்தும் செயல் என்று குறிப்பிட்ட அவர், தவறு செய்தவர்கள் தங்களின் சொந்தக் கட்சி நிதியிலிருந்து உதவலாமே தவிர, அதற்கு அரசுப் பணத்தைச் செலவிடுவதை எவ்விதத்திலும் ஏற்றுக்கொள்ள முடியாது என்று கூறித் தனது கண்டனத்தைப் பதிவு செய்தார்.