“விஜய் இல்லை… அண்ணாமலை தான்”… அப்சரா ரெட்டியின் திடீர் யூ-டர்ன்… பின்னணியில் விழுந்த மெகா ஸ்கெட்ச்… தமிழக அரசியலில் அடுத்த டுவிஸ்ட்….!

அதிமுகவின் கொள்கைப் பரப்புத் துணைச் செயலாளராகப் பொறுப்பேற்ற ஒரே மாதத்தில், அக்‌கட்சியில் இருந்து விலகுவதாக அறிவித்துத் தமிழக அரசியல் களத்தில் பரபரப்பை ஏற்படுத்தியவர் அப்சரா ரெட்டி. மறைந்த முன்னாள் முதல்வர் ஜெயலலிதாவால் அரசியலுக்கு அறிமுகப்படுத்தப்பட்ட இவர், அதிமுக, பாஜக, காங்கிரஸ் என பல்வேறு தளங்களில் இயங்கிய அனுபவம் கொண்டவர். அகில இந்திய அளவில் காங்கிரஸ் கட்சியின் தேசியப் பொறுப்பை வகித்த முதல் திருநங்கை என்ற பெருமைக்குரிய இவர், அதிமுகவிலிருந்து விலகியது அவரது அடுத்தகட்ட அரசியல் நகர்வு குறித்த எதிர்பார்ப்புகளை அதிகரித்திருந்தது.

முன்னதாக, அதிமுகவின் முக்கிய நிர்வாகியான சிங்கை ராமச்சந்திரன் கட்சியை விட்டு விலகி, நடிகர் விஜய்யின் ‘தமிழக வெற்றி கழகத்தில்’ இணைந்த கையோடு அப்சராவும் விலகல் கடிதம் கொடுத்தார். இதனால், அப்சராவும் தவெகவில் இணையக்கூடும் என்ற வலுவான ஊகங்கள் எழுந்தன. எடப்பாடி பழனிசாமிக்கு அனுப்பிய கடிதத்தில், “மனசாட்சிக்கும் கொள்கைகளுக்கும் உண்மையாக இருக்கவே இந்த முடிவை எடுத்தேன்” எனக் குறிப்பிட்டிருந்தாரே தவிர, எந்தக் கட்சியில் இணையப் போகிறார் என்பதை அவர் வெளிப்படையாக அறிவிக்காமல் தொடர்ந்து மௌனம் காத்து வந்தார்.

இந்தச் சூழலில்தான், அண்ணாமலையை அப்சரா ரெட்டி நேரில் சந்தித்து நீண்ட நேரம் ஆலோசனையில் ஈடுபட்டுள்ளார். சென்னையில் நடைபெற்ற இந்தச் சந்திப்பில், பெண்கள் மற்றும் இளைஞர்களின் அரசியல் பங்களிப்பு, கல்வி, சுற்றுச்சூழல் மற்றும் சமூக முன்னேற்றம் சார்ந்த முக்கிய தலைப்புகள் குறித்து இருவரும் விவாதித்ததாகத் தெரிகிறது. தவெகவில் இணைவார் என்று பரவலாகப் பேசப்பட்டு வந்த வேளையில், அண்ணாமலையுடனான இந்த திடீர் சந்திப்பு அரசியல் வட்டாரத்தில் புதிய திருப்பத்தை ஏற்படுத்தியுள்ளது.

ஜெயலலிதாவின் கொள்கை வழியில் வந்தவர் என்பதால், அப்சராவின் சமூகச் சிந்தனைகளையும் அனுபவத்தையும் அண்ணாமலை தனது அரசியல் களத்தில் பயன்படுத்திக் கொள்ள முன்வரலாம் என்ற எதிர்பார்ப்பும் நிலவுகிறது. இருப்பினும், இந்த ஒரே ஒரு சந்திப்பை மட்டும் வைத்து அவர் அண்ணாமலையுடன் இணைவாரா அல்லது புதிய பாதையைத் தேர்ந்தெடுப்பாரா என்பதை உறுதியாகக் கூற முடியாது. தனது அரசியல் பயணம் எந்தக் திசையில் சென்றாலும் மக்களுக்கான சேவையைத் தொடர்வேன் என்று கூறியுள்ள அப்சராவின் அடுத்த அதிரடி முடிவு என்ன என்பதைப் பொறுத்திருந்துதான் பார்க்க வேண்டும்.