ஐயோ பாவம்… மேலும் ஒரு கல்லூரி மாணவன் பலி… அடுத்தடுத்து நடக்கும் கொடூரம்… நெஞ்சை பதறவைக்கும் பின்னணி…!

காஞ்சிபுரம் மாவட்டம் வாலாஜாபாத் அருகே உள்ள வல்லபாக்கம் பகுதியைச் சேர்ந்த 17 வயது கல்லூரி மாணவர் வரபிரசாத், தோப்பிற்கு விறகு வெட்டுவதற்காகச் சென்றுள்ளார். அப்போது, அங்குள்ள தோட்டத்தில் எதிர்பாராதவிதமாக அறுந்து கிடந்த உயர் அழுத்த மின்சாரக் கம்பியை அவர் கவனிக்காமல் மிதித்துள்ளார். இதில் மின்சாரம் பாய்ந்து மாணவர் வரபிரசாத் நிகழ்விடத்திலேயே பரிதாபமாக உயிரிழந்தார்.

இச்சம்பவம் குறித்து தகவலறிந்ததும், மாணவனின் உறவினர்களும் அப்பகுதி மக்களும் பெரும் சோகத்திலும் அதிர்ச்சியிலும் ஆழ்ந்தனர். மின்சார வாரியத்தின் அலட்சியப் போக்கே மாணவனின் உயிரிழப்பிற்கு முக்கியக் காரணம் எனக்கூறி, ஆத்திரமடைந்த உறவினர்கள் மற்றும் பொதுமக்கள் வாலாஜாபாத் பகுதியில் உள்ள மின்வாரிய அலுவலகத்தை முற்றுகையிட்டு தீவிர போராட்டத்தில் ஈடுபட்டனர்.

தகவல் அறிந்து வந்த காவல்துறையினர் மற்றும் அதிகாரிகள், போராட்டத்தில் ஈடுபட்டவர்களுடன் பேச்சுவார்த்தை நடத்தினார்கள். கவனக்குறைவாக இருந்த மின்வாரிய ஊழியர்கள் மீது உரிய நடவடிக்கை எடுக்க வேண்டும் என்றும், உயிரிழந்த மாணவனின் குடும்பத்திற்கு உரிய நிவாரணம் வழங்க வேண்டும் என்றும் கோரிக்கைகள் வலுத்து வருகின்றன. இந்த சோக சம்பவம் அப்பகுதியில் பெரும் பரபரப்பை ஏற்படுத்தியுள்ளது.