ஒரே வாரத்தில் 18 லட்சம் பேரா?…. அண்ணாமலை காட்டிய மாஸ்… ஆடிப்போன தமிழக பாஜக தலைமை…. உள்ளாட்சித் தேர்தலுக்கு முன் நடக்கும் பரபரப்பு….!

தமிழக பாஜகவின் முன்னாள் தலைவர் அண்ணாமலை அண்மையில் தொடங்கிய ‘வீ த லீடர்ஸ்’ (We the Leaders) இயக்கம் குறுகிய காலத்திலேயே அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது. இந்த இயக்கம் தொடங்கப்பட்ட சில வாரங்களிலேயே சுமார் 18 லட்சத்திற்கும் அதிகமானோர் (துல்லியமாக 18,72,878 பேர்) இதில் உறுப்பினர்களாக இணைந்துள்ளதாகத் தகவல்கள் வெளியாகியுள்ளன. அண்ணாமலை மாநிலத் தலைவராக இருந்தபோது அவரது அரசியல் பாணியால் ஈர்க்கப்பட்டு பாஜகவில் இணைந்த இளைஞர்களும், புதிய தொண்டர்களும் தற்போது இந்த புதிய அமைப்பில் சேர ஆர்வம் காட்டி வருவது அண்ணாமலையின் ஆதரவாளர்களுக்கு உற்சாகத்தை அளித்துள்ளது.

இத்தகைய அசுர வேக உறுப்பினர் சேர்க்கையால் தமிழக பாஜக தலைமைக்குக் கூடுதல் கவலை ஏற்பட்டுள்ளதாக அரசியல் வட்டாரங்கள் தெரிவிக்கின்றன. ஏற்கனவே கட்சியின் முக்கிய நிர்வாகிகள் மற்றும் தொண்டர்கள் சிலர் அண்ணாமலையின் இயக்கத்திற்குச் சென்றுவிட்ட நிலையில், மேலும் இந்த இடப்பெயர்ச்சி தொடர்வதைத் தடுக்க தமிழகம் முழுவதும் மாவட்ட வாரியாக அவசர அவசரமாக ஆலோசனைக் கூட்டங்கள் நடத்தப்பட்டு வருகின்றன. மதுரையில் நடைபெற்ற கூட்டங்களில் முன்னாள் எம்.எல்.ஏ எம்.ஆர். காந்தி, மீனாதேவ் போன்ற மூத்த தலைவர்கள் பங்கேற்று, தொண்டர்களைத் தக்கவைப்பதற்கான ஆலோசனைகளை வழங்கியுள்ளனர்.

இந்த ஆலோசனைக் கூட்டங்களில், “யாரும் கட்சியை விட்டு வெளியேறக் கூடாது; தனிநபர்களை விட கட்சியின் கொள்கைகளே முக்கியம்” என்று மூத்த நிர்வாகிகள் தொண்டர்களுக்கு அறிவுறுத்தி வருகின்றனர். இதற்கு முன்பும் முக்கியத் தலைவர்கள் விலகியபோதும் கட்சியின் வளர்ச்சி பாதிக்கப்படவில்லை என்பதைச் சுட்டிக்காட்டும் நிர்வாகிகள், விரைவில் வரவிருக்கும் உள்ளாட்சித் தேர்தலைக் கருத்தில் கொண்டு தேர்தல் பணிகளில் முழு கவனம் செலுத்த வேண்டும் என்றும், கட்சியை விட்டு விலகியவர்களை மீண்டும் பாஜகவிற்குள் கொண்டு வர முயற்சிக்க வேண்டும் என்றும் வலியுறுத்தியுள்ளனர்.

மறுபுறம், அண்ணாமலையின் இயக்கம் தொடங்கப்பட்டு 20 நாட்களாகியும் உறுப்பினர் எண்ணிக்கை இன்னும் 20 லட்சத்தை எட்டவில்லை என்பதால், பெரும்பாலான தொண்டர்கள் இன்னும் பாஜகவிலேயே நீடிக்கிறார்கள் என்று கட்சியின் ஒரு தரப்பினர் வாதிடுகின்றனர். எது எப்படியாயினும், ஒருபுறம் அண்ணாமலையின் ‘வீ த லீடர்ஸ்’ இயக்கம் தீவிர உறுப்பினர் சேர்க்கையில் ஈடுபட்டு வர, மறுபுறம் தனது நிர்வாகிகளையும் தொண்டர்களையும் தக்கவைத்துக் கொள்ள பாஜக மாவட்டந்தோறும் சமாதானக் கூட்டங்களை நடத்தி வருவது தமிழக அரசியல் களத்தில் பெரும் பரபரப்பை ஏற்படுத்தியுள்ளது.