“எங்கள மிரட்டுறீங்களா…? கொந்தளித்த அனிதா ராதாகிருஷ்ணன்…! கைதான திமுக எம்.எல்.ஏ கதறல்…!” சோஷியல் மீடியாவில் தீயாய் பரவும் சர்ச்சை… பின்னணி என்ன…?

விளாத்திக்குளம் தொகுதி திமுக சட்டமன்ற உறுப்பினரான மார்க்கண்டேயன் இன்று காலை காவல்துறையினரால் கைது செய்யப்பட்டார். சுமார் 10 மணி நேர தீவிர விசாரணைக்குப் பிறகு, அவர் மருத்துவப் பரிசோதனைக்காகத் தூத்துக்குடி அரசு மருத்துவமனைக்கு அழைத்து வரப்பட்டார். இந்தச் செய்தியறிந்து அவரைச் சந்திப்பதற்காகத் திமுக முன்னாள் அமைச்சர்களான அனிதா ராதாகிருஷ்ணன், கீதா ஜீவன் மற்றும் வழக்கறிஞர்கள் மருத்துவமனைக்கு வருகை தந்தனர். ஆனால், காவல்துறையினர் அவர்களைச் சந்திக்க அனுமதி மறுத்ததால் அங்கு பெரும் பரபரப்பான சூழல் நிலவியது.

சந்திப்பிற்கு அனுமதி மறுக்கப்பட்டதால், அனிதா ராதாகிருஷ்ணன் மற்றும் அவருடன் வந்த வழக்கறிஞர்கள் காவல்துறையினருடன் காரசார வாக்குவாதத்தில் ஈடுபட்டனர். அப்போது தூத்துக்குடி ஏ.டி.எஸ்.பி திபு, மார்க்கண்டேயன் ஒரு குற்றஞ்சாட்டப்பட்டவர் என்றும், நீதிமன்றத்திற்கு வருமாறும் கூறி அட்வகேட்டுகளுக்கு அங்கே இடமில்லை எனத் தெரிவித்தார். இதற்குப் பதிலடி கொடுத்த அனிதா ராதாகிருஷ்ணன், இது மருத்துவமனைதானே தவிரக் காவல் நிலையம் அல்ல என்று ஆவேசமாகப் பேசினார். ஏ.டி.எஸ்.பி உங்கள் மீதும் நடவடிக்கை எடுக்க முடியும் என எச்சரிக்க, வழக்கறிஞர்களும் கைது நடவடிக்கையின் போது பின்பற்றப்பட வேண்டிய சட்ட நடைமுறைகள் பின்பற்றப்பட்டதா எனக் கேள்விகளை எழுப்பினர்.

இதனிடையே, எம்.எல்.ஏ மார்க்கண்டேயன் செய்தியாளர்களைச் சந்திக்கக் கூடாது என்பதற்காகப் போலீசார் அவரை மருத்துவமனையின் பின்வாசல் வழியாக அழைத்து வந்தனர். அப்போது, போலீசார் துப்பாக்கி முனையில் மிரட்டுவதாகவும், தன்னைச் சவக்கிடங்கில் அடைக்கப் போவதாகவும் கூச்சலிட்ட மார்க்கண்டேயன், மருத்துவப் பரிசோதனைக்குப் பின் காவல்துறையினர் யாருடைய உத்தரவுக்கோ காத்திருப்பதாகக் குற்றம்சாட்டினார். மேலும், ஏ.டி.எஸ்.பி திபு செய்தியாளர்களையும் மிரட்டும் தொனியில் பேசியதாகக் கூறப்படும் வீடியோ காட்சிகள் இணையத்தில் வெளியாகி பெரும் சர்ச்சையை ஏற்படுத்தியுள்ளன.