“பள்ளிக்கரணை சதுப்புநிலத்தில் ரூ.70,000 கோடி ஊழல்”…. முதலமைச்சருக்கு அன்புமணி கொடுத்த ஷாக் எச்சரிக்கை…. தமிழக அரசியலில் அடுத்த பரபரப்பு….!

பள்ளிக்கரணை சதுப்பு நிலத்தைப் பாதுகாப்பதிலும், அங்கு நடைபெறும் முறைகேடுகளைத் தடுப்பதிலும் தமிழ்நாடு அரசு உடனடியாக நடவடிக்கை எடுக்க வேண்டும் என்று பாட்டாளி மக்கள் கட்சியின் தலைவர் அன்புமணி ராமதாஸ் வலியுறுத்தியுள்ளார். சென்னை பனையூரில் செய்தியாளர்களைச் சந்தித்த அவர், பள்ளிக்கரணை சதுப்பு நிலத்தை அழிக்கும் வகையில் சுமார் 70 ஆயிரம் கோடி ரூபாய் மதிப்பிலான மிகப்பெரிய சதி திட்டம் தீட்டப்பட்டு வருவதாகக் குற்றம்சாட்டினார். இந்த விவகாரத்தில் தமிழக அரசின் உயரதிகாரி ஒருவரின் நேரடி தலையீடு இருப்பதாகவும் அவர் பகிரங்கமாகச் சாடியுள்ளார்.

சதுப்பு நில எல்லையை வரையறுப்பது தொடர்பாக 200 வகையான வரைபடங்கள் சமர்ப்பிக்கப்பட்ட போதிலும், தனியார் கட்டுமான நிறுவனங்களின் நலன்களைக் காப்பதற்காக அந்த மூத்த அதிகாரி அவற்றை நிராகரித்துள்ளதாக அன்புமணி குற்றம்சாட்டினார். உயர் நீதிமன்றத்திலேயே தவறான தகவல்களைத் தரும் அளவுக்கு அரசு அதிகாரிகள் செயல்பட்டு வருவதாகவும் அவர் குறிப்பிட்டார். இயற்கை வடிநிலமாகச் செயல்படும் பள்ளிக்கரணை அழிக்கப்பட்டால், சென்னை மாநகரம் வெள்ளப் பெருக்கால் கடுமையாகப் பாதிக்கப்படும் என்றும், வெள்ள வடிநீரைத் தடுத்து தனியார் நிறுவனங்கள் கட்டடங்கள் கட்டவே இந்த சூழ்ச்சி நடப்பதாகவும் அவர் தெரிவித்தார்.

வனத்துறைக்குச் சொந்தமான பாதுகாக்கப்பட்ட சதுப்பு நிலப் பகுதியில், உலக வங்கியின் கடனுதவியுடன் 21 கோடி ரூபாய் செலவில் 10 அடி உயரத்திலும் 15 அடி அகலத்திலும் பளிங்குக் கற்கள் பதித்து நடைபாதை மற்றும் சாலை அமைக்கப்பட்டிருப்பதற்கு அவர் கடும் எதிர்ப்பு தெரிவித்தார். பொதுமக்கள் அனுமதிக்கப்படாத ஒரு பகுதியில் எதற்காக இவ்வளவு பெரிய தொகையில் நடைபாதை அமைக்கப்பட வேண்டும் என்று கேள்வி எழுப்பிய அவர், இதற்கு உத்தரவிட்ட அதிகாரியை உடனடியாகப் பணியிடை நீக்கம் செய்வதுடன், அந்தச் சட்டவிரோதச் சாலையை இடித்து அகற்ற வேண்டும் என்றும் கோரினார்.

நிர்வாகப் பொறுப்பிற்குப் புதியவரான முதலமைச்சர் விஜய், அதிகாரிகள் சொல்வதை கண்மூடித்தனமாக நம்பாமல் உண்மை நிலவரத்தைக் கண்டறிந்து இதில் நேரடியாகத் தலையிட வேண்டும் என்று அன்புமணி வலியுறுத்தினார். பரந்தூர் விமான நிலையத் திட்டம் போன்ற பெரிய திட்டங்களை நிறுத்திய முதலமைச்சர், சென்னையைக் காக்கும் பள்ளிக்கரணை சதுப்பு நில விவகாரத்திலும் தனி கவனம் செலுத்த வேண்டும் என்றும், தவறினால் பாமக சார்பில் தீவிர போராட்டங்கள் முன்னெடுக்கப்படும் என்றும் எச்சரித்தார். இதில் நடவடிக்கை எடுக்கவில்லை என்றால் ரூ.50,000 கோடி ஊழல் என்ற குற்றச்சாட்டுக்கு அவர் ஆளாக நேரிடும் எனவும் எச்சரித்தார்.

சதுப்பு நில விவகாரம் மட்டுமின்றி, சென்னை பட்டினப்பாக்கத்தில் புதிய தலைமைச் செயலகம் அமைக்கும் திட்டத்தையும் அரசு கைவிட வேண்டும் என்று அவர் கேட்டுக்கொண்டார். அடுத்த 100 ஆண்டுகால தேவைகளைக் கருத்தில் கொண்டு குறைந்தபட்சம் 100 ஏக்கர் பரப்பளவில் விசாலமான இடத்தில் சட்டப்பேரவையுடன் கூடிய தலைமைச் செயலகம் அமைக்கப்பட வேண்டும் என்றும், தற்போதைய தேர்வு போக்குவரத்து நெரிசலையும் பொதுமக்கள் இயல்பு வாழ்க்கையையும் பாதிக்கும் என்றும் சுட்டிக்காட்டினார்.

அத்தியாவசிய பொருட்களான அரிசி, பருப்பு ஆகியவற்றின் விலை உயர்ந்து வருவதால் பொதுமக்கள் எதிர்கொள்ளும் சிரமங்கள் குறித்தும் அவர் கவலை தெரிவித்தார். அதே வேளையில், நாட்டின் பொருளாதாரத்தில் தாக்கம் ஏற்படுத்திய அமெரிக்கத் தேர்தல் முடிவுகளில் டொனால்ட் டிரம்ப் பின்னடைவைச் சந்தித்தது சர்வதேச அளவில் தற்காலிகமான ஒரு மாற்றத்தை அளித்திருப்பதாகத் தனது செய்தியாளர் சந்திப்பின் போது அன்புமணி ராமதாஸ் குறிப்பிட்டார்.