அன்புமணிக்கு ஆப்பு…. அதிமுகவுடன் கூட்டணி… எனக்கு மட்டுமே உரிமை… எகிறி அடிக்கும் ராமதாஸ்….!

தமிழக அரசியலில் பெரும் பரபரப்பை ஏற்படுத்தியுள்ள பாட்டாளி மக்கள் கட்சியின் உட்கட்சி மோதல், தற்போது தேர்தல் ஆணையம் வரை சென்றுள்ளது. அதிமுக பொதுச்செயலாளர் எடப்பாடி பழனிசாமியுடன் அன்புமணி ராமதாஸ் நடத்திய கூட்டணி பேச்சுவார்த்தை சட்டவிரோதமானது என்று குறிப்பிட்டு, பாமக நிறுவனர் மருத்துவர் ராமதாஸ் இந்திய தேர்தல் ஆணையத்திற்கு ஒரு முக்கிய கடிதத்தை எழுதியுள்ளார். அன்புமணி பாமகவின் பெயரைப் பயன்படுத்துவதற்கும், கூட்டணி குறித்து முடிவெடுப்பதற்கும் எவ்வித சட்டபூர்வமான உரிமையும் இல்லை என்று அதில் அவர் அதிரடியாகக் குறிப்பிட்டுள்ளார்.

சமீபத்தில் அன்புமணி ராமதாஸ் மற்றும் எடப்பாடி பழனிசாமி ஆகியோர் சந்தித்து, வரும் சட்டமன்றத் தேர்தலில் அதிமுக – பாமக கூட்டணி உறுதி செய்யப்பட்டதாக அறிவித்தனர். இது அரசியல் வட்டாரத்தில் பேசுபொருளாக மாறிய நிலையில், அதற்கு எதிர்ப்பு தெரிவித்துள்ள ராமதாஸ், தேர்தல் கூட்டணி குறித்து பேச்சுவார்த்தை நடத்தவும், இறுதி முடிவெடுக்கவும் தனக்கு மட்டுமே முழு அதிகாரம் இருப்பதாகக் கூறியுள்ளார். கட்சிக்குத் தானே தலைவர் என்று இரு தரப்பும் உரிமை கோரி வரும் நிலையில், ராமதாஸின் இந்த கடிதம் பாமக தொண்டர்களிடையே பெரும் குழப்பத்தையும் அதிர்ச்சியையும் ஏற்படுத்தியுள்ளது.

சட்டமன்றத் தேர்தலுக்கு இன்னும் சில மாதங்களே உள்ள நிலையில், தந்தைக்கும் மகனுக்கும் இடையிலான இந்த நேரடி மோதல் அதிமுக கூட்டணியிலும் தாக்கத்தை ஏற்படுத்தும் என எதிர்பார்க்கப்படுகிறது. பாமகவின் பெயர் மற்றும் அதிகாரத்தை அன்புமணி சட்டவிரோதமாகப் பயன்படுத்துவதைத் தடுக்க வேண்டும் என்றும், அவர் மீது உரிய நடவடிக்கை எடுக்க வேண்டும் என்றும் ராமதாஸ் தனது கடிதத்தில் வலியுறுத்தியுள்ளார். இதனால், பாமகவின் அதிகாரப்பூர்வத் தலைமை யார் என்பதையும், அக்கட்சியின் தேர்தல் நிலைப்பாட்டையும் தேர்தல் ஆணையமே தீர்மானிக்கும் சூழல் தற்போது உருவாகியுள்ளது.