மரணத்தின் விளிம்பில் அமெரிக்க வீரர்!.. ஈரானிடம் சிக்காமல் தனது வீரரை மீட்டெடுத்த டிரம்ப்… உலகையே அதிரவைத்த அந்த 24 மணி நேர ஆப்பரேஷன்…!!!

ஈரானின் தெற்குப் பகுதியில் அமெரிக்கப் போர் விமானங்கள் நடத்திய கடுமையான தாக்குதலின் போது, அமெரிக்காவின் F-15E ரக போர் விமானம் ஒன்று ஈரானியப் படைகளால் சுட்டு வீழ்த்தப்பட்டது. இந்த விபரீதச் சம்பவத்தில் விமானத்தில் இருந்த இரண்டு விமானிகள் பாராசூட் மூலம் கீழே குதித்து உயிர் தப்பினர். இதில் ஒரு விமானி உடனடியாக மீட்கப்பட்ட நிலையில், மற்றொரு விமானி ஈரானின் அபாயகரமான மலைப்பகுதிகளில் எதிரிகளின் பாதுகாப்பு வளையத்திற்குள் சிக்கிக்கொண்டார். அவரை ஈரானியப் படைகள் நெருங்கிக் கொண்டிருந்ததால், அவரை மீட்பது அமெரிக்காவிற்குப் பெரும் சவாலாக மாறியது.

இந்தச் சூழலில், அமெரிக்க வரலாற்றிலேயே மிகவும் துணிச்சலான தேடுதல் மற்றும் மீட்பு நடவடிக்கையை அந்நாட்டு ராணுவம் வெற்றிகரமாக நடத்தியுள்ளது. எதிரி நாட்டுப் பகுதிக்குள் சிக்கியிருந்த அந்த வீரமிக்க விமானியை மீட்க, அதிபர் டிரம்பின் உத்தரவின் பேரில் உலகின் மிகவும் சக்திவாய்ந்த ஆயுதங்களைக் கொண்ட டஜன் கணக்கிலான போர் விமானங்கள் அனுப்பப்பட்டன. அமெரிக்க தலைமைத் தளபதி, போர்ச் செயலாளர் மற்றும் கூட்டுப் படைத் தலைவர்கள் என உயர்மட்ட அதிகாரிகள் 24 மணி நேரமும் அவரது இருப்பிடத்தைக் கண்காணித்து, மிகத் துல்லியமாகத் திட்டமிட்டு இந்த அதிரடி மீட்புப் பணியைச் செயல்படுத்தினர்.

சுமார் ஒரு நாளுக்கும் மேலாக நீடித்த இந்தப் பரபரப்பான தேடுதல் வேட்டையின் இறுதியில், அந்த விமானி பத்திரமாக மீட்கப்பட்டதாக அதிபர் டிரம்ப் அதிகாரப்பூர்வமாக அறிவித்துள்ளார். மீட்பு நடவடிக்கையின் போது அந்த வீரருக்குச் சில காயங்கள் ஏற்பட்டிருந்தாலும், அவர் விரைவில் நலமடைந்து விடுவார் என்று தெரிவிக்கப்பட்டுள்ளது. ஈரானின் பிடியில் சிக்காமல் தனது வீரரை மீட்டெடுத்த இந்த நடவடிக்கை, அமெரிக்க ராணுவத்தின் வலிமையையும் நுணுக்கமான திட்டமிடலையும் உலகிற்குப் பறைசாற்றுவதாக அமைந்துள்ளது.