DMK Vs NDA கூட்டணி?… ராமதாஸ் கொடுத்த ஹிண்ட்… 2026-ல் மாறப்போகும் மெகா கூட்டணி…!

தமிழகத்தில் சட்டமன்றத் தேர்தல் களம் சூடுபிடித்துள்ள நிலையில் பாமகவின் கூட்டணி நிலைப்பாடு குறித்து அக்கட்சியின் நிறுவனர் மருத்துவர் ராமதாஸ் செய்தியாளர்களிடம் விளக்கமளித்துள்ளார். முன்னதாக, பரமக்குடியில் நடைபெற்ற திமுக பொதுக்கூட்டத்தில் பேசிய அமைச்சர் ராஜகண்ணப்பன், மருத்துவர் ராமதாஸ் திமுக கூட்டணிக்கு வந்து கொண்டிருப்பதாகக் கூறி அரசியல் வட்டாரத்தில் பெரும் பரபரப்பை ஏற்படுத்தினார். இது தொடர்பான கேள்விக்கு பதிலளித்த ராமதாஸ், தேர்தல் நேரங்களில் பல்வேறு யூகங்களும் பேச்சுகளும் வருவது இயல்புதான் என்றும், அதில் உண்மையும் இருக்கலாம் பொய்யும் இருக்கலாம் என்றும் மர்மமான முறையில் பதிலளித்துள்ளார்.

தேசிய ஜனநாயகக் கூட்டணியில் இருந்து பாமக விலகிவிட்டதா அல்லது புதிய கூட்டணி அமைய வாய்ப்புள்ளதா என்ற செய்தியாளர்களின் கேள்விக்கு, இன்னும் இறுதி முடிவு எடுக்கப்படவில்லை என்று ராமதாஸ் தெரிவித்துள்ளார். தேர்தல் நேரத்தில் எதுவும் நடக்கலாம், நடக்காமலும் போகலாம் என்று குறிப்பிட்ட அவர், இப்போதைக்கு எதையும் உறுதிபடக் கூற முடியாது எனத் தெரிவித்தார். திமுக அமைச்சரின் வெளிப்படையான பேச்சு மற்றும் மறைந்த முதல்வர் கருணாநிதியுடனான நட்பு குறித்த கேள்விகளுக்கும் அவர் நேரடியாகப் பதிலளிக்காமல் தவிர்த்துவிட்டார்.

அன்புமணி ராமதாஸ் ஏற்கனவே அதிமுக பொதுச்செயலாளர் எடப்பாடி பழனிசாமியைச் சந்தித்துக் கூட்டணியை உறுதி செய்திருந்த நிலையில், அது செல்லாது என ராமதாஸ் அறிவித்தது அக்கட்சிக்குள் நிலவும் குழப்பத்தைப் பிரதிபலித்தது. தற்போது அன்புமணி தரப்பு எம்.எல்.ஏக்கள் மூன்று பேரை ராமதாஸ் அதிரடியாக நீக்கியுள்ள சூழலில், பாமகவின் அடுத்தகட்ட நகர்வு என்னவாக இருக்கும் என்பது தமிழக அரசியலில் மிகுந்த எதிர்பார்ப்பை ஏற்படுத்தியுள்ளது. வரும் நாட்களில் பாமகவின் கூட்டணி குறித்த தெளிவான முடிவு தெரியவரும் என எதிர்பார்க்கப்படுகிறது.