ஆன்லைனில் சரக்கு ஆர்டர்…. இரண்டே நாளில் ரூ.20 லட்சம் கலெக்‌ஷன்… மாஸ் காட்டும் தவெக அரசின் அதிரடி QR Code திட்டம்…!

தமிழ்நாட்டில் டாஸ்மாக் கடைகளில் மதுபான பாட்டில்களுக்கு நிர்ணயிக்கப்பட்ட விலையை விடக் கூடுதலாக ரூ.10 வசூலிக்கப்படுவதாகப் பல புகார்கள் எழுந்து வந்தன. இந்த முறைகேட்டைக் கட்டுப்படுத்தி, விற்பனையில் வெளிப்படைத் தன்மையை கொண்டுவரும் நோக்கில் தவெக அரசு தீவிர நடவடிக்கைகளை மேற்கொண்டு வருகிறது. கூடுதல் கட்டண வசூலைத் தடுக்க டாஸ்மாக் நிர்வாகம் ஊழியர்களுடன் தொடர்ந்து பேச்சுவார்த்தை நடத்தி வரும் அதே வேளையில், வாடிக்கையாளர்கள் நேரடியாக MRP விலையிலேயே மதுபானங்களைப் பெறுவதற்கான நவீனத் தொழில்நுட்ப மாற்றங்களையும் அறிமுகப்படுத்தியுள்ளது.

இதன் முக்கியப் பகுதியாக, வீற்றிருந்தபடியே மதுபானங்களை முன்பதிவு செய்யும் புதிய ஆன்லைன் இணையதளத் திட்டத்தை அண்மையில் அரசு தொடங்கியது. இதன் மூலம் மதுப்பிரியர்கள் தங்கள் மொபைல் அல்லது கணினி வாயிலாக அருகில் உள்ள கடைகளில் என்னென்ன மதுபானங்கள் இருப்பு உள்ளன என்பதை எளிதில் அறிந்து கொள்ள முடியும். ஆன்லைனில் முன்பதிவு செய்து தொகையைச் செலுத்தியவுடன் ஒரு QR Code உருவாக்கப்படும். இந்த QR Code-ஐ டாஸ்மாக் கடையில் காட்டி மதுபானங்களைப் பெற்றுக் கொள்ளலாம். இத்திட்டத்தால் கூடுதல் கட்டணம் செலுத்துவது தவிர்க்கப்படுவதோடு, தங்களுக்குத் தேவையான பிராண்டுகளையும் எளிதாகத் தேர்வு செய்ய முடிகிறது.

கடந்த 7-ஆம் தேதி தொடங்கப்பட்ட இப்புதிய முறைக்கு மக்களிடையே கணிசமான வரவேற்பு கிடைத்துள்ளது. அறிமுகமான முதல் நாளிலேயே ஆன்லைன் மூலம் ரூ.11.62 லட்சத்திற்கு மதுபானங்கள் விற்பனையாகின. இரண்டாம் நாளான 8-ஆம் தேதி சுமார் 3,000 முன்பதிவுகள் செய்யப்பட்டு ரூ.9 லட்சத்திற்கு விற்பனை நடைபெற்றது. இதன் மூலம் தொடக்கம் பெற்ற முதல் இரண்டு நாட்களிலேயே ஆன்லைன் வழியில் மட்டும் ரூ.20 லட்சத்திற்கும் அதிகமான தொகையிலான மதுபானங்கள் விற்பனையாகி சாதனை படைத்துள்ளன.