திமுக தோல்வியால் உஷாரான அகிலேஷ் யாதவ்!… “இனி அவங்க வேண்டாம்”… உத்தரப் பிரதேச அரசியலில் திடீர் பூகம்பம்…!!!

உத்தரப் பிரதேச மாநிலத்தில் அடுத்த ஆண்டு நடைபெறவுள்ள சட்டசபைத் தேர்தலில், பாஜகவை வீழ்த்தி மீண்டும் ஆட்சியைப் பிடிக்க அகிலேஷ் யாதவ் தீவிரம் காட்டி வருகிறார். இதற்காகப் பிரபல அரசியல் வியூக நிறுவனமான ‘ஐ-பேக்’ (I-PAC) உடன் இணைந்து செயல்பட முதலில் திட்டமிடப்பட்டது. இருப்பினும், சமீபத்திய அரசியல் மாற்றங்களைக் கருத்தில் கொண்டு, அந்த நிறுவனத்துடனான ஒப்பந்தத்தைக் கிடப்பில் போட சமாஜ்வாதி கட்சி முடிவு செய்துள்ளதாகத் தகவல்கள் வெளியாகியுள்ளன. அதிகாரப்பூர்வ அறிவிப்பு வரவில்லை என்றாலும், வெளி நிறுவனங்களை நம்புவதை விடச் சொந்தக் கட்சி இயந்திரத்தை வலுப்படுத்துவதே புத்திசாலித்தனம் என அகிலேஷ் கருதுகிறார்.

இந்த அதிரடி முடிவுக்குத் தமிழ்நாடு மற்றும் மேற்கு வங்க தேர்தல் முடிவுகளே முக்கியக் காரணமாகச் சொல்லப்படுகிறது. குறிப்பாக, தமிழகத்தில் ஐ-பேக் நிறுவனத்தின் வியூகங்களையும் மீறி விஜய் தலைமையிலான தவெக எழுச்சி பெற்றதும், திமுக தோல்வியைத் தழுவியதும் அகிலேஷை யோசிக்க வைத்துள்ளது. அதேபோல், மேற்கு வங்கத்தில் மம்தா பானர்ஜி ஆட்சியைப் பறிகொடுத்தது, ஐ-பேக் நிறுவனத்தின் மீதான நம்பகத்தன்மையைக் கேள்விக்குறியாக்கியுள்ளது. இந்தத் தோல்விகள், தேர்தல் வியூக நிறுவனங்களால் மட்டுமே வெற்றியை உறுதி செய்ய முடியாது என்ற யதார்த்தத்தை அவருக்கு உணர்த்தியுள்ளது.

மேலும், ஐ-பேக் நிறுவனம் சந்தித்து வரும் சட்டச் சிக்கல்களும் சமாஜ்வாதி கட்சியின் பின்வாங்கலுக்கு ஒரு காரணமாகும். நிலக்கரி கடத்தல் தொடர்பான பணமோசடி புகாரில் ஐ-பேக் அலுவலகங்களில் அமலாக்கத்துறை சோதனை நடத்தியது பெரும் பரபரப்பை ஏற்படுத்தியது. லக்னோவில் ஐ-பேக் பிரதிநிதிகள் சமாஜ்வாதி தலைவர்களுக்கு விளக்கம் அளித்துக் கொண்டிருந்த அதே நேரத்தில், கொல்கத்தாவில் சோதனை நடைபெற்றது கட்சித் தலைமையைப் பெரும் அதிருப்திக்கு உள்ளாக்கியது. இத்தகைய சர்ச்சைகளில் சிக்கியுள்ள நிறுவனத்துடன் கைகோர்ப்பது தேர்தலின் போது தேவையற்ற பின்னடைவை ஏற்படுத்தலாம் என அகிலேஷ் அஞ்சுகிறார்.

தற்போது தனது வியூகத்தை முழுமையாக மாற்றியுள்ள அகிலேஷ் யாதவ், அடிமட்டத் தொண்டர்கள் மற்றும் உள்ளூர் நிர்வாகிகளை ஒருகிணைப்பதில் கவனம் செலுத்தத் தொடங்கியுள்ளார். வேலைவாய்ப்பின்மை, சாதிவாரி கணக்கெடுப்பு மற்றும் விவசாயிகள் பிரச்சினைகளை முன்வைத்து பாஜகவை நேரடியாக எதிர்கொள்ள அவர் திட்டமிட்டுள்ளார். கார்ப்பரேட் நிறுவனங்களின் தரவுகளைச் சார்ந்திருப்பதை விட, மக்களின் நாடித்துடிப்பை அறிந்த கட்சியின் களப்பணியாளர்களே வெற்றிக்கு வழிவகுப்பார்கள் என்ற முடிவுக்குச் சமாஜ்வாதி கட்சி வந்துள்ளது.