ஏர்டெல் வாடிக்கையாளர்களுக்கு ஷாக்…. சத்தமில்லாமல் உயர்ந்த ரீச்சார்ஜ் கட்டணம்… ஒரே நாளில் இவ்வளவா….?

ஏர்டெல் நிறுவனம் தனது பயனர்களிடையே மிகவும் பிரபலமான 84 நாட்கள் வேலிடிட்டி கொண்ட ப்ரீபெய்ட் திட்டத்தின் விலையை அதிரடியாக உயர்த்தியுள்ளது. இதுவரை ரூ.859 விலையில் வழங்கப்பட்டு வந்த இந்தத் திட்டம், தற்போது 40 ரூபாய் அதிகரிக்கப்பட்டு ரூ.899 ஆக மாற்றப்பட்டுள்ளது. 5ஜி சேவைகள் அறிமுகமான பிறகு டேட்டா பயன்பாடு அதிகரித்துள்ள சூழலில், சந்தாதாரர்களின் சராசரி வருவாயை (ARPU) அதிகரிக்கும் நோக்கில் நிறுவனம் இந்த விலை உயர்வைச் சத்தமின்றி மேற்கொண்டுள்ளதாகத் தெரிகிறது.

புதிய ரூ.899 திட்டத்தின் கீழ் வாடிக்கையாளர்களுக்கு அன்லிமிடெட் லோக்கல் மற்றும் எஸ்டிடி அழைப்புகள், தினமும் 100 இலவச எஸ்எம்எஸ்கள் மற்றும் நாளொன்றுக்கு 1.5 ஜிபி அதிவேக டேட்டா ஆகிய வசதிகள் 84 நாட்களுக்கு வழங்கப்படுகின்றன. தினசரி டேட்டா வரம்பு தீர்ந்தவுடன் இணைய வேகம் 64 Kbps ஆகக் குறைக்கப்படும். குறிப்பாக, இந்தத் திட்டத்தில் 12 மாத கால அடோப் எக்ஸ்பிரஸ் பிரீமியம் (Adobe Express Premium) சந்தா மற்றும் தேவையற்ற அழைப்புகளைத் தடுக்கும் ஸ்பேம் அலர்ட் போன்ற கூடுதல் பலன்களும் சேர்க்கப்பட்டுள்ளன.

இருப்பினும், இந்த விலை உயர்வில் ஒரு பின்னடைவாக, முன்பு ரூ.859 திட்டத்தில் வழங்கப்பட்ட ‘ரிவார்ட்ஸ் மினி’ (RewardsMini) சலுகை தற்போது நீக்கப்பட்டுள்ளதாகத் தகவல்கள் தெரிவிக்கின்றன. கேஷ்பேக் உள்ளிட்ட பணப்பயன்களை வழங்கி வந்த இந்தச் சலுகை நீக்கப்பட்டது வாடிக்கையாளர்களுக்குச் சற்று ஏமாற்றத்தை அளித்துள்ளது. ஏர்டெல் நிறுவனம் இந்த மாற்றங்கள் குறித்து அதிகாரப்பூர்வ அறிவிப்பை இன்னும் வெளியிடவில்லை என்றாலும், இணையதளத்தில் புதிய விலைகள் ஏற்கனவே மாற்றப்பட்டுவிட்டன.

சமீபத்தில் சர்வதேச ரோமிங் கட்டணங்களை உயர்த்திய ஏர்டெல், இப்போது உள்நாட்டுப் பயன்பாட்டுத் திட்டத்திலும் கைவைத்துள்ளது அதிர்ச்சியை ஏற்படுத்தியுள்ளது. இது முழுமையான விலை உயர்வு அல்ல என்றாலும், படிப்படியாக மற்ற திட்டங்களின் விலையையும் உயர்த்த நிறுவனம் திட்டமிட்டு வருவதையே இது காட்டுகிறது. குறிப்பாக, வாடிக்கையாளர்களை அதிக லாபம் தரும் 5ஜி மற்றும் நீண்ட கால திட்டங்களுக்கு மாற்றும் வணிக உத்தியாகவே சந்தை வல்லுநர்கள் இதைக் கருதுகின்றனர்.