“விஜய்க்கு அதிர்ச்சி கொடுத்த இபிஎஸ்”…. புதுச்சேரி ரிசார்ட்டில் நடந்த நள்ளிரவு ரகசிய ஆலோசனை… கசிந்த திடுக்கிடும் தகவல்…!

தமிழக சட்டசபைத் தேர்தல் முடிவுகள் வெளியாகி, எந்தக் கட்சிக்கும் அறுதிப் பெரும்பான்மை கிடைக்காத நிலையில், மாநில அரசியல் களம் தற்போது புதுச்சேரியை நோக்கி நகர்ந்துள்ளது. 108 இடங்களில் வெற்றி பெற்று தனிப்பெரும் கட்சியாக உருவெடுத்த தமிழக வெற்றிக் கழகம், காங்கிரஸ் ஆதரவுடன் 112 இடங்களை எட்டிய போதிலும், ஆட்சி அமைக்கத் தேவையான 118 இடங்களைப் பிடிக்க முடியாமல் திணறி வருகிறது. ஆளுநர் அர்லேகர் மெஜாரிட்டியை நிரூபிக்கக் கோரியுள்ள சூழலில், தவெக தலைவர் விஜய் மற்ற கட்சிகளின் ஆதரவைத் திரட்ட முற்பட்டு வருகிறார். இந்த அரசியல் இழுபறிக்கு மத்தியில், அதிமுக தனது எம்.எல்.ஏக்களைப் பாதுகாக்கும் நோக்கில் புதுச்சேரி பூரணாங்குப்பத்தில் உள்ள தனியார் ரிசார்ட்டில் தங்கவைத்துள்ளது பெரும் பரபரப்பைக் கிளப்பியுள்ளது.

புதுச்சேரி ரிசார்ட்டில் தங்கியுள்ள 30-க்கும் மேற்பட்ட அதிமுக எம்.எல்.ஏக்களை, அக்கட்சியின் பொதுச்செயலாளர் எடப்பாடி பழனிசாமி இன்று நேரில் சந்தித்து ஆலோசனை நடத்தினார். அவருடன் கே.பி.முனுசாமி, எஸ்.பி.வேலுமணி, நத்தம் விஸ்வநாதன் உள்ளிட்ட முக்கிய நிர்வாகிகளும் சென்றிருந்தனர். இந்தச் சந்திப்பின் போது, “நாளைய முதல்வர் எடப்பாடியார்” என்ற முழக்கங்கள் ரிசார்ட் வளாகத்தை அதிரச் செய்தன. தவெக ஆட்சி அமைக்க இன்னும் 6 எம்.எல்.ஏக்கள் தேவைப்படும் நிலையில், அதிமுக எம்.எல்.ஏக்கள் யாரும் கட்சி மாறிவிடக் கூடாது என்பதில் தலைமை மிகத் தீவிரமாக இருப்பதை இந்த அதிரடி விசிட் உறுதிப்படுத்தியுள்ளது.

எம்.எல்.ஏக்கள் மத்தியில் உரையாற்றிய எடப்பாடி பழனிசாமி, “தமிழக அரசியல் இனி அதிமுகவை நோக்கித்தான் நகரும், பொறுத்திருங்கள் நல்லதே நடக்கும்” என நம்பிக்கையூட்டியதாகத் தகவல்கள் வெளியாகியுள்ளன. மேலும், திமுகவுடன் எந்தக் காலத்திலும் கூட்டணி கிடையாது என்பதில் உறுதியாக இருக்குமாறும், யாரும் ரிசார்ட்டை விட்டு வெளியேற வேண்டாம் என்றும் அவர் அறிவுறுத்தியுள்ளார். பெரும்பான்மை பலம் இல்லாத தவெக தலைவர் விஜய், ஆட்சி அமைக்கப் போராடி வரும் நிலையில், இறுதியில் அதிமுக தலைமையிலேயே ஆட்சி அமைவதற்கான வாய்ப்புகள் இருப்பதாக இபிஎஸ் பேசியது அரசியல் வட்டாரத்தில் புதிய விவாதத்தைக் கிளப்பியுள்ளது.

தவெக தரப்பு எப்படியாவது ஆட்சியைப் பிடிக்க காய்களை நகர்த்தி வரும் வேளையில், எடப்பாடி பழனிசாமியின் இந்த “வெயிட் அண்ட் வாட்ச்” பாணி அணுகுமுறை விஜய் தரப்பை அதிர்ச்சியில் ஆழ்த்தியுள்ளது. 53 தொகுதிகளில் வெற்றி பெற்றுள்ள அதிமுக கூட்டணி, தற்போதைய அரசியல் குழப்பத்தைப் பயன்படுத்தி மீண்டும் ஆட்சிக் கட்டிலில் அமரத் திட்டமிடுகிறதா அல்லது தவெக-வின் முயற்சிக்கு முட்டுக்கட்டை போடுகிறதா என்பது இன்னும் சில தினங்களில் தெரிந்துவிடும். தமிழக அரசியலில் அடுத்த முதல்வர் யார் என்பதைத் தீர்மானிக்கும் சக்தியாக இப்போது புதுச்சேரி ரிசார்ட் அரசியல் மாறியுள்ளது.