தமிழக அரசியலில் அதிரடி திருப்பம்….. அதிமுக கூட்டணியில் பாஜகவிற்கு இத்தனை இடங்களா?… நள்ளிரவில் கசிந்த ரகசிய பட்டியல்…!

தமிழக சட்டமன்றத் தேர்தல் 2026-க்கான களம் சூடுபிடித்துள்ள நிலையில், அதிமுக தலைமையிலான தேசிய ஜனநாயகக் கூட்டணியில் (NDA) தொகுதிப் பங்கீடு குறித்த முக்கியத் தகவல்கள் வெளியாகியுள்ளன. இதன்படி, பாரதிய ஜனதா கட்சிக்கு (BJP) அதிமுக தரப்பில் 27 முதல் 29 இடங்கள் வரை ஒதுக்கப்பட வாய்ப்புள்ளதாகத் தெரிகிறது. கடந்த 2021 தேர்தலை விட கூடுதல் இடங்களை பாஜக கோரிய நிலையில், இந்த உத்தேசப் பட்டியல் அரசியல் வட்டாரத்தில் பெரும் விவாதத்தை ஏற்படுத்தியுள்ளது.

இந்தக் கூட்டணியில் பாஜக மட்டுமல்லாது பாட்டாளி மக்கள் கட்சி (PMK), அமமுக மற்றும் பிற சிறிய கட்சிகளும் இடம்பெற்றுள்ளன. தற்போதைய நிலவரப்படி, பாமக-விற்கு சுமார் 18 இடங்களும், டி.டி.வி. தினகரனின் அமமுக-விற்கு 9 இடங்களும் ஒதுக்கப்படலாம் என எதிர்பார்க்கப்படுகிறது. மீதமுள்ள சுமார் 170-க்கும் மேற்பட்ட தொகுதிகளில் அதிமுக நேரடியாகப் போட்டியிட்டு, தனது பலத்தை நிரூபிக்கத் திட்டமிட்டுள்ளது.

தொகுதிப் பங்கீடு குறித்து பேச்சுவார்த்தை நடத்த அதிமுக பொதுச்செயலாளர் எடப்பாடி பழனிசாமி தலைமையில் கே.பி. முனுசாமி, எஸ்.பி. வேலுமணி உள்ளிட்டோர் அடங்கிய நால்வர் குழு ஏற்கனவே அமைக்கப்பட்டுள்ளது. இந்தக் குழுவினர் கூட்டணிக் கட்சிகளுடன் ரகசியப் பேச்சுவார்த்தையில் ஈடுபட்டு வரும் நிலையில், அதிகாரப்பூர்வ அறிவிப்பு இம்மாத இறுதிக்குள் வெளியாகலாம் என்று நம்பப்படுகிறது. குறிப்பாக, வெற்றி வாய்ப்புள்ள தொகுதிகளை அடையாளம் காண்பதில் இரு தரப்பிற்கும் இடையே இழுபறி நீடிப்பதாகவும் கூறப்படுகிறது.

இந்த முறை தேர்தல் களம் திமுக, அதிமுக-பாஜக கூட்டணி மற்றும் நடிகர் விஜய்யின் தமிழக வெற்றிக் கழகம் என மும்முனைப் போட்டியாக உருவெடுத்துள்ளது. சீமான் தலைமையிலான நாம் தமிழர் கட்சியும் தனித்துப் போட்டியிடுவதால், வாக்குகள் சிதற வாய்ப்புள்ள சூழலில், அதிமுக தனது கூட்டணிக் கணக்குகளை மிகவும் கவனமாகப் போட்டு வருகிறது. ஏப்ரல் 23 அன்று வாக்குப்பதிவு நடைபெறவுள்ள நிலையில், இந்தத் தொகுதிப் பங்கீடு இறுதியானால் தேர்தல் பிரச்சாரம் அடுத்த கட்டத்திற்கு நகரும்.