“சாப்பாட்டுக்கே வழியில்லை.. கதறி அழுத நடிகை”… எரும சாணி விஜயகுமார் மீது அடுக்கடுக்கான பாலியல் மற்றும் பண மோசடி புகார்கள்… அதிர்ச்சியில் கோலிவுட்…!

‘எரும சாணி’ புகழ் விஜயகுமார் மீது துணை நடிகை ஒருவர் சுமத்தியுள்ள மோசடி மற்றும் அடுக்கடுக்கான புகார்கள் சமூக வலைதளங்களில் பெரும் அதிர்வலைகளை ஏற்படுத்தி வருகின்றன. ஜியோ ஹாட்ஸ்டார் தயாரிப்பில் உருவான ‘ரிசார்ட்’ (Resort) என்ற வெப் சீரிஸில் ஸ்ரீநிதி என்ற கதாபாத்திரத்தில் நடிக்க ஒப்பந்தமானதாகவும், ஓராண்டு கால ஒப்பந்தம் போட்டு தன்னை மற்ற வேலைகளுக்குச் செல்ல விடாமல் தடுத்து முடக்கிவிட்டதாகவும் அந்த நடிகை வீடியோ மூலம் வேதனையோடு தெரிவித்துள்ளார். கேரளாவின் ஒரு சிறிய கிராமத்திலிருந்து வந்து சினிமாவில் சாதிக்கத் துடித்த தமக்கு, இந்த அனுபவம் பெரும் ஏமாற்றத்தைத் தந்துள்ளதாக அவர் குற்றம்சாட்டியுள்ளார்.

நடிகையின் கூற்றுப்படி, விஜயகுமாரின் அழைப்பின் பேரில் பலமுறை ஆடிஷனுக்கு வந்து சென்ற பின்னரே இந்த வாய்ப்பு கிடைத்துள்ளது. படப்பிடிப்பு சரியாக நடக்காத நிலையில், தனக்குத் தர வேண்டிய சம்பளத்தை முறையாக வழங்காமல் இழுத்தடிப்பதாகவும், இது குறித்து கேட்டால் தயாரிப்பு தரப்பும் விஜயகுமாரும் ஒருவரை ஒருவர் கைகாட்டித் தப்பிக்கப் பார்ப்பதாகவும் அவர் குறிப்பிட்டுள்ளார். இதனால் கடந்த நான்கு மாதங்களாக எந்த வேலையும் வருமானமும் இன்றித் தவிப்பதாகவும், மற்றொரு வாய்ப்பு வந்தபோது கூட இந்தத் தயாரிப்பு நிறுவனம் தன்னைச் செல்லவிடாமல் தடுத்ததாகவும் அவர் தனது குமுறலை வெளிப்படுத்தியுள்ளார்.

நிதி நெருக்கடி மற்றும் மன உளைச்சல் காரணமாகத் தான் மருத்துவமனையில் அனுமதிக்கப்பட்ட போது கூட, மனிதநேயமின்றித் தன்னைப் படப்பிடிப்புக்கு வர வேண்டாம் என்று விஜயகுமார் தரப்பில் கூறியதாக அந்த நடிகை சாடியுள்ளார். மேலும், விஜயகுமாரின் மனைவி நக்‌ஷத்ராவும் ஒரு பெண்ணாகத் தன்னைப் புரிந்துகொள்ளாமல் அவதூறாகப் பேசியது தமக்கு மிகுந்த மனவலியைத் தந்ததாகக் கூறியுள்ளார். “நீங்களாகத்தானே நடிக்க வந்தீர்கள்?” எனப் பொறுப்பற்ற முறையில் பேசுபவர்களால், சினிமாவிற்கு வரும் புதியவர்களின் பாதுகாப்பு கேள்விக்குறியாகிறது என்பதே அவரது பிரதான குற்றச்சாட்டாக உள்ளது.

யூடியூப் மூலம் பிரபலமடைந்து ‘மீசைய முறுக்கு’ உள்ளிட்ட படங்களில் நடித்த விஜயகுமார், தற்போது இயக்குநராகவும் நடிகராகவும் வளர்ந்து வரும் சூழலில், அவர் மீது எழுந்துள்ள இந்தப் புகார் சினிமா வட்டாரத்தில் சலசலப்பை ஏற்படுத்தியுள்ளது. குளோபல் வில்லேஜ் நிறுவனம் மற்றும் விஜயகுமார் ஆகியோர் இளம் கலைஞர்களைச் சுரண்டுவதாக நடிகை வைத்துள்ள இந்தக் குற்றச்சாட்டுகள் குறித்து இதுவரை சம்பந்தப்பட்ட தரப்பினர் எந்த விளக்கமும் அளிக்கவில்லை. இச்சம்பவம், திரைத்துறையில் நுழையும் துணை நடிகைகள் சந்திக்கும் ஒப்பந்தச் சிக்கல்களையும் பணிச் சூழல் அவலங்களையும் மீண்டும் வெளிச்சத்திற்கு கொண்டு வந்துள்ளது.