எத்தனையோ படம் நடித்திருந்தாலும் ஒரே படத்தால் இந்தியா லெவலில் பிரபலம் ஆகிட்டேன்… ராம்கி மகிழ்ச்சி!

தமிழ் சினிமாவில் 1980 களில் அறிமுகமாகி குறுகிய காலத்தில் முன்னணி நடிகராக மாறியவர் ராம்கி. சின்னப் பூவே மெல்லப் பேசு என்ற திரைப்படத்தின் மூலம் அறிமுகமான ஹேண்ட்சம் நடிகரான ராம்கி முதல் படத்திலேயே கவனம் ஈர்த்தார்.

அதன் பின்னர் வரிசையாக படங்களில் நடித்த அவருக்கு மருதுபாண்டி, செந்தூரப் பூவே, பறவைகள் பலவிதம், இணைந்த கைகள்,  வனஜா கிரிஜா உள்ளிட்ட படங்கள் பெயர் சொல்லும் படங்களாக அமைந்தன.  ஆனால் ஒரு கட்டத்துக்கு மேல் அவரால் மார்க்கெட்டில் நிலைக்க முடியவில்லை.

அதனால் அவருக்கு சினிமாவில் இருந்து ஒரு இடைவேளை விழுந்தது. பின்னர் குணச்சித்திர நடிகராகவும் வில்லன் நடிகராகவும் சில படங்களில் தோன்றினார். ஆனால் எதுவுமே அவருக்கு ஒரு கம்பேக் படமாக அமையவில்லை.

அந்த சூழ்நிலையில்தான் கடந்த தீபாவளிக்கு வெளியான ல்க்கி பாஸ்கர் திரைப்படம் அவரை மீண்டும் லைம்லைட்டில் கொண்டுவந்துள்ளது. அந்த படத்தில் அவர்  நடித்த ஆண்டனி கதாபாத்திரம் மிகச்சிறிய ஒன்றாக இருந்தாலும் அந்த கதாபாத்திரம் போல நம்பிக்கைக்குரிய ஒரு நண்பர் இருந்தால் நாம் வாழ்க்கையில் முன்னேறி விடலாம் என மீம்கள் பரவி வருகின்றன.

இதுபற்றி பேசியுள்ள ராம்கி “லக்கி பாஸ்கர் படம் 5 மொழிகளில் ரிலீஸ் ஆனதால், அதன் வெற்றி என்னை அனைத்து மொழி ரசிகர்களுக்கும் கொண்டு சென்றுள்ளது. படம் ரிலீஸானதில் இருந்து வாழ்த்துகளாகக் குவிகின்றன. இப்படி ஒரே நாளில் நான் அனைத்து மொழி ரசிகர்களுக்கும் சென்று சேர்வேன் என நினைத்ததேயில்லை.” எனக் கூறியுள்ளார்.

ராம்கி 100க்கும் மேற்பட்ட படங்களில் நடித்துள்ளார். ஆனால் அப்போதெல்லாம் கிடைக்காத புகழ் இப்போது அவருக்கு லக்கி பாஸ்கர் படத்தின் மூலமாகவே கிடைத்துள்ளது.