இன்ஸ்டாகிராமில் ஆபாச தொல்லை.. சென்னையில் பட்டதாரி பெண்ணை மிரட்டிய வாலிபர்.. பின்னணி என்ன..?

சென்னை வளசரவாக்கம் பகுதியைச் சேர்ந்த 23 வயது இளம் பெண், பி.எஸ்.சி விஸ்காம் படித்து முடித்துவிட்டு சினிமா துறையில் உதவி இயக்குனராகப் பணியாற்றி வருகிறார். இவருடைய இன்ஸ்டாகிராம் பக்கத்திற்கு சில போலி கணக்குகள் (Fake IDs) மூலம் தொடர்ந்து ஆபாசமான குறுஞ்செய்திகள் அனுப்பப்பட்டு வந்துள்ளன. மேலும், கடந்த ஏப்ரல் மாதம் அந்த நபர், இப்பெண்ணின் சகோதரருடைய இன்ஸ்டாகிராம் பக்கத்திலும் இவரைப் பற்றி அவதூறாகப் பேசி, ஆபாசப் படம் ஒன்றை அனுப்பி மிரட்டியுள்ளார். இதனால் மன உளைச்சலுக்கு ஆளான அந்தப் பெண் வளசரவாக்கம் அனைத்து மகளிர் காவல் நிலையத்தில் புகார் அளித்தார்.

பாதிக்கப்பட்ட பெண்ணின் புகாரின் பேரில், தகவல் தொழில்நுட்பச் சட்டம் (IT Act) மற்றும் தமிழ்நாடு பெண்கள் வன்கொடுமை தடுப்புச் சட்டம் (TNPHW Act) ஆகிய பிரிவுகளின் கீழ் போலீசார் வழக்குப் பதிவு செய்தனர். வளசரவாக்கம் அனைத்து மகளிர் காவல் நிலைய ஆய்வாளர் தலைமையிலான தனிப்படையினர் தீவிர விசாரணை நடத்தினர். சைபர் க்ரைம் உதவியுடன் நடத்தப்பட்ட இந்த விசாரணையில், ஆபாச மெசேஜ் அனுப்பிய நபர் சென்னை சின்ன போரூர் பகுதியைச் சேர்ந்த பிரைஸ் கிறிஸ்டன் (21) என்பது கண்டுபிடிக்கப்பட்டு, அவர் கைது செய்யப்பட்டார். அவரிடமிருந்த செல்போனும் பறிமுதல் செய்யப்பட்டது.

போலீசாரின் விசாரணையில், கைது செய்யப்பட்ட பிரைஸ் கிறிஸ்டனும் பாதிக்கப்பட்ட பெண்ணும் கல்லூரியில் ஒன்றாகப் படித்தவர்கள் என்பது தெரியவந்தது. இவர்கள் இருவரும் கல்லூரி காலத்தில் ஒன்றாக இணைந்து ஒரு குறும்படம் (Short Film) எடுத்தபோது அவர்களுக்குள் கருத்து வேறுபாடு ஏற்பட்டுள்ளது. அந்தப் பகையின் காரணமாகவே, பிரைஸ் கிறிஸ்டன் பல போலி இன்ஸ்டாகிராம் கணக்குகளை உருவாக்கி அந்தப் பெண்ணிற்குத் தொடர்ந்து ஆபாச மெசேஜ்களை அனுப்பி பழிவாங்க முயன்றுள்ளார். விசாரணையின் முடிவில் பிரைஸ் கிறிஸ்டன் நீதிமன்றத்தில் ஆஜர்படுத்தப்பட்டு, சிறையில் அடைக்கப்பட்டார்.