ஆடம்பர அடுக்குமாடி குடியிருப்பு “₹50,000 வாடகை, ஆனால் அனுபவிக்க நேரமில்லை” கார்ப்பரேட் வாழ்க்கையின் கசப்பான உண்மையை உடைத்த இளைஞர்..!!

பெங்களூருவின் பரபரப்பான கார்ப்பரேட் வாழ்க்கை முறையையும், அங்குள்ள பணி கலாச்சாரத்தையும் பிரதிபலிக்கும் வகையில் ஷுபம் லோந்தே என்ற இளைஞர் பகிர்ந்துள்ள வீடியோ சமூக வலைதளங்களில் பெரும் விவாதத்தை ஏற்படுத்தியுள்ளது. பெங்களூருவில் நீச்சல் குளம், உடற்பயிற்சி கூடம் உள்ளிட்ட அனைத்து நவீன வசதிகளும் கொண்ட சொகுசு அடுக்குமாடி குடியிருப்பில் வசிக்கும் அவர், இதற்காக மாதந்தோறும் சுமார் ₹50,000 வாடகையாகச் செலுத்துகிறார். இருப்பினும், இவ்வளவு செலவு செய்தும் அந்த வசதிகளைப் பயன்படுத்த தனக்கு நேரமே இல்லை என்கிற கசப்பான உண்மையை அவர் தனது @trainwithshubham இன்ஸ்டாகிராம் பக்கத்தில் பதிவிட்டுள்ளார்.

அலுவலக வேலை, கடுமையான போக்குவரத்து நெரிசல் மற்றும் அன்றாடப் பொறுப்புகளுக்கு இடையில் தனது நாள் எப்படி முடிகிறது என்றே தெரியவில்லை என ஷுபம் அந்த வீடியோவில் வேதனை தெரிவித்துள்ளார். பிரீமியம் வசதிகள் இருந்தும், வேலையினால் ஏற்படும் சோர்வு மற்றும் நேரமின்மையால் அவற்றைப் பயன்படுத்த முடியாமல் போவதாக அவர் கூறுகிறார். “எனக்கு நேரமில்லை” என்ற அவரது ஒற்றை வாக்கியம், நகரங்களில் இயந்திரத்தனமாக ஓடிக்கொண்டிருக்கும் ஆயிரக்கணக்கான ஐடி மற்றும் கார்ப்பரேட் ஊழியர்களின் நிதர்சனமான நிலையாகப் பார்க்கப்படுகிறது.