“இன்ஸ்டாகிராம் ரீல்ஸுக்காக இப்படியா?.. அசுர மலைப்பாம்பு மீது படுத்திருக்கும் சிறுமி.. பதறாமல் வீடியோ எடுக்கும் குடும்பம்.. கொந்தளித்த நெட்டிசன்கள்”..!!

இணையத்தில் சில பார்வைகளுக்காகவும் ரீல்களுக்காகவும் மக்கள் தங்கள் உயிரையே பணயம் வைக்கும் சம்பவங்கள் அதிகரித்து வரும் நிலையில், ஒரு சிறுமி மாபெரும் மலைப்பாம்பின் மீது படுத்து விளையாடும் திகிலூட்டும் காணொளி ஒன்று சமூக வலைதளங்களில் வேகமாகப் பரவி வருகிறது. அந்த வீடியோவில், ஒருவர் பிரம்மாண்டமான வலைப்பாம்பின் (Reticulated Python) உடலைத் தூக்கிச் சிறுமியின் மீது வைக்க, அவளோ எவ்வித பயமுமின்றி அதன் மேல் சாதாரணமாகப் படுத்துக் கொள்கிறாள். “ரியல் டார்சான்” என்று அழைக்கப்படும் பிரபல அமெரிக்க இன்ஃப்ளூயன்சர் மைக் ஹோல்ஸ்டன் தனது இன்ஸ்டாகிராம் பக்கத்தில் பகிர்ந்துள்ள இந்த வீடியோ பார்ப்பவர்களை அதிர வைத்துள்ளது.

இந்தக் காணொளி வெளியான உடனே நெட்டிசன்கள் பலரும் தங்களது கடும் கண்டனங்களையும் கோபத்தையும் வெளிப்படுத்தி வருகின்றனர். ஒருவேளை அந்தப் பாம்பு பசியோடு இருந்து சிறுமியைத் தாக்கியிருந்தால் என்னவாகியிருக்கும் என்றும், வெறும் சமூக ஊடகப் புகழுக்காகத் தன் மகளின் உயிரைப் பணயம் வைக்கும் இதுபோன்ற பொறுப்பற்ற பெற்றோர்களை உடனடியாகச் சிறையில் அடைக்க வேண்டும் என்றும் மக்கள் கொந்தளித்து வருகின்றனர். மேலும், ஒருமுறை இந்த விலங்கு தனது பிடியை இறுக்கினால் சில நொடிகளில் உயிர் பிரிந்துவிடும் என்றும் பல பயனர்கள் எச்சரித்துள்ளனர்.

உலகின் மிக நீளமான மற்றும் அதிக எடை கொண்ட பாம்பு இனமான இந்த வலைப்பாம்புகள் சராசரியாக 22 அடி முதல் 31 அடி நீளம் வரையும், 75 முதல் 150 கிலோ எடை வரையும் வளரக்கூடியவை. இந்தோனேசியாவின் காடுகளைத் தாயகமாகக் கொண்ட இந்த மலைப்பாம்புகளுக்கு மனிதர்களை முழுமையாக உயிருடன் விழுங்கும் திறன் உண்டு என்பது குறிப்பிடத்தக்கது. இத்தகைய ஆபத்தான வேட்டையாடும் விலங்கைச் செல்லப் பிராணி போலக் கருதி, குடும்பத்தினரே நின்று வீடியோ எடுத்திருப்பது பெரும் விவாதத்தை ஏற்படுத்தியுள்ளது.