“ஐயோ பாவம்… என் மகனுக்கு 10 லட்சம் சம்பளம்… ஆனா நான் முதியோர் இல்லத்துல தவிக்கிறேன்… பிரபல மூத்த நடிகரின் கண்ணீர் பேட்டி…!”

பிரபல மூத்த நடிகரும் தயாரிப்பாளருமான மோகன் சர்மா, 80 வயதில் வறுமை மற்றும் உடல்நலக் குறைவு காரணமாக கும்மிடிப்பூண்டியில் உள்ள ஆதரவற்றோர் முதியோர் இல்லத்தில் தங்கியிருக்கும் நிலை திரையுலகினரை வேதனையில் ஆழ்த்தியுள்ளது. புனே திரைப்படக் கல்லூரியில் பயின்ற இவர், தமிழ், மலையாளம், தெலுங்கு உள்ளிட்ட மொழிகளில் 170-க்கும் மேற்பட்ட படங்களில் நடித்துள்ளார். ‘சச்சின்’, ‘சலங்கை ஒலி’ போன்ற திரைப்படங்களிலும், ‘கோலங்கள்’ சின்னத்திரை தொடரிலும் முக்கியக் கதாபாத்திரங்களில் நடித்த இவர், 20 திரைப்படங்களைத் தயாரித்துள்ளதுடன் தென்னிந்திய திரைப்பட வர்த்தக சபையின் தலைவராகவும், தேசிய திரைப்பட விருதுக் குழுவின் உறுப்பினராகவும் பொறுப்பு வகித்தவர் ஆவார்.

தான் தயாரித்து இயக்கிய ‘நம்ம கிராமம்’ படத்திற்காக வாங்கிய கடனை அடைக்க முடியாமல் போனதாலும், அதைத் தொடர்ந்து ஏற்பட்ட நிதி நெருக்கடியினாலும் தனது சொத்துக்களை இழந்து கையில் பணமின்றி முதியோர் இல்லத்திற்கு வந்ததாகக் குறிப்பிட்டுள்ளார். அத்துடன் வயது முதிர்வால் ஏற்பட்ட நோய்களுக்கு மருந்து கூட வாங்க முடியாமல் தவித்த நிலையில், நடிகர் ரஜினிகாந்த் இவரைத் தொடர்புகொண்டு உடனடியாக ரூ.1 லட்சம் நிதி உதவி வழங்கி உதவியுள்ளார். ஜெயலலிதா தனக்கு உதவுவதாகக் கூறியிருந்த வாக்குறுதி அவர் மறைந்ததால் நிறைவேறாமல் போயவிட்டதாகவும் அவர் வருத்தத்துடன் பகிர்ந்துள்ளார்.

குடும்பத்தைப் பிரிந்து தனிமையில் வாழும் மோகன் சர்மா, தனது ‘நம்ம கிராமம்’ படத்தின் சேட்டிலைட் உரிமையை யாராவது வாங்கினால் தனது மருத்துவச் செலவுகளுக்குப் பயனுள்ளதாக இருக்கும் எனக் கோரிக்கை விடுத்துள்ளார். மேலும், தமிழக முதல்வர் விஜயைச் சந்திக்க நேரம் கேட்டு காத்திருக்கும் இவர், ஃபிலிம் சேம்பரில் வயதான கலைஞர்களுக்கு உதவி செய்யும் விதிகள் மாற்றப்பட்டது குறித்தும் கவலை தெரிவித்துள்ளார். சினிமாத்துறையில் முதலீடு செய்யும்போது எச்சரிக்கையாக இருக்க வேண்டும் என்பதே இவர் இளம் தலைமுறைக்கு வழங்கும் அனுபவப் பாடமாக உள்ளது.