யார் சாமி நீ… ஸ்பைடர் மேன் அவதாரத்தில் வந்த மாணவர்… அரசுக்கு அடித்த வித்தியாசமான சாட்டையடி…!

ஜார்க்கண்ட் மாநிலம் ராஞ்சியில், ஜார்க்கண்ட் அரசுப் பணியாளர் தேர்வாணையம் மற்றும் பணியாளர் தேர்வு வாரியம் நடத்திய அரசுப் பணித் தேர்வுகளில் நடைபெற்றதாகக் கூறப்படும் முறைகேடுகளுக்கு எதிராக ஆயிரக்கணக்கான மாணவர்கள் சட்டமன்ற முற்றுகைப் போராட்டம் நடத்தினர். இந்தப் போராட்டத்தின் போது, ‘ஸ்பைடர் மேன்’ முகமூடி மற்றும் ஆடை அணிந்து வந்த மாணவர் ஒருவர், “நாங்கள் ‘ஜென்-இசட்’ தலைமுறையைச் சேர்ந்தவர்கள் என்பதால் எங்கள் எதிர்ப்புத் தெரிவிக்கும் முறை வித்தியாசமானது; சாதாரண மாணவர்களின் குரல் அரசுக்குக் கேட்கவில்லை, ஒருவேளை இந்த ஸ்பைடர் மேனின் குரலாவது அரசுக்குக் கேட்கும் என்ற நம்பிக்கையில் வந்துள்ளேன்” என்று கிண்டலாகப் பேசிய வீடியோ சமூக வலைதளங்களில் பெரும் வரவேற்பைப் பெற்று வைரலாகி வருகிறது.

இந்தப் போராட்டத்தின் போது, அசம்பாவிதங்களைத் தடுக்க ராஞ்சி சட்டமன்றப் பகுதியில் பலத்த போலீஸ் பாதுகாப்பு போடப்பட்டிருந்தது. இருப்பினும், மாணவர்கள் காவல்துறையினரின் தடுப்புகளை மீறி முன்னேற முயன்றதால் அப்பகுதியில் பெரும் பரபரப்பு ஏற்பட்டது. கூட்டத்தைக் கலைக்கக் காவல்துறை நீர் பாய்ச்சும் கருவிகளைப் பயன்படுத்தியபோதிலும், மாணவர்கள் தடுப்புகளின் மீது ஏறி நின்று தங்களது கோரிக்கைகளை வலியுறுத்தினர். தங்களது போராட்டம் முற்றிலும் அமைதியான முறையில் நடைபெறுவதாகவும், நியாயம் கிடைக்கும் வரை போராட்டம் தொடரும் என்றும் மாணவர்கள் தெரிவித்தனர்.

மாணவர்களின் போராட்டம் தீவிரமடைந்த அதே நாளில், ஜார்க்கண்ட் குற்றப் புலனாய்வுத் துறை முக்கிய நடவடிக்கை ஒன்றை எடுத்தது. தேர்வு முறைகேடுகள் தொடர்பான வழக்கில், JPSC அமைப்பின் முன்னாள் தலைவரான எல். கியாங்டே என்பவரை சிஐடி போலீசார் கைது செய்ததை அதிகாரப்பூர்வமாக உறுதிப்படுத்தினர். மாணவர்களின் விசித்திரமான போராட்டமும், அரசுத் தேர்வாணைய முன்னாள் தலைவரின் கைதும் அம்மாநிலத்தில் பெரும் கவனத்தைப் பெற்றுள்ளன.