நெஞ்சை பதறவைக்கும் காட்சி..! நடுவானில் 245 அடி உயரத்தில் நின்ற ரோலர் கோஸ்டர்.. படிக்கட்டில் நடுங்கியபடி கீழே இறங்கிய மக்கள்… நெட்டிசன்கள் அதிர்ச்சி…!!

அமெரிக்காவின் டெக்சாஸ் மாகாணத்தில் உள்ள புகழ்பெற்ற ‘சிக்ஸ் பிளாக்ஸ் ஓவர் டெக்சாஸ்’ பொழுதுபோக்கு பூங்காவில் ஏற்பட்ட திடீர் மின்சார முறிவு, அங்கு வந்த பார்வையாளர்களுக்கு பெரும் அதிர்ச்சியை ஏற்படுத்தியுள்ளது. கடந்த சனிக்கிழமை மதியம், பூங்காவிற்கு வெளியே நடந்த கட்டுமானப் பணியின் போது நிலத்தடி மின்வயர் ஒன்று தற்செயலாக சேதமடைந்ததால் இந்த மின் தடை ஏற்பட்டது. இதனால் பூங்கா முழுவதும் இயங்கி வந்த ராட்சத ரோலர் கோஸ்டர் உள்ளிட்ட பல சாகச விளையாட்டுகள் நடுவழியில், அப்படியே நடுவானில் நின்றன.

குறிப்பாக, பூங்காவின் மிக உயரமான மற்றும் ஆபத்தான ரோலர் கோஸ்டரான 245 அடி உயரமுடைய ‘தி டைட்டன்’ மற்றும் 236 அடி உயரமுடைய ‘மிஸ்டர் ஃபிரீஸ்’ ஆகிய ரயில்கள் செங்குத்தான உயரத்தில் நின்றதால் அதில் பயணித்த பயணிகள் அனைவரும் காற்றில் தொங்கியபடி அச்சத்தில் உறைந்தனர். மின்சாரம் வராததைத் தொடர்ந்து, பூங்காவின் பாதுகாப்பு ஊழியர்கள் களம் இறங்கி, ரயில்களில் இருந்த பாதுகாப்பு பெல்ட்டுகளை கைமுறையாக தளர்த்தி பயணிகளை மீட்டனர். பலத்த காற்று வீசிய சூழலில், பூங்கா ஊழியர்கள் உதவியுடன் பயணிகள் அனைவரும் அந்த ராட்சத இரும்பு கட்டமைப்பின் ஓரத்தில் இருந்த குறுகிய அவசரக்கால படிக்கட்டுகள் வழியாக ஒவ்வொன்றாக கீழே இறங்கி வந்தனர்.

இந்த பயங்கரமான மீட்புப் பணியை அங்கிருந்தவர்கள் வீடியோவாக எடுத்து டிக்டாக் மற்றும் எக்ஸ் (X) தளங்களில் பகிர, அது இணையத்தில் காட்டுத்தீயாய் பரவி வருகிறது. “உயரத்தைக் கண்டு பயப்படுபவர்களின் மிக மோசமான கனவு இது” என்றும், “அவ்வளவு உயரத்தில் இருந்து வெறும் கைப்பிடியை மட்டும் பிடித்துக்கொண்டு கீழே இறங்குவது விளையாட்டை விட பயங்கரமானது” என்றும் நெட்டிசன்கள் தங்களின் அதிர்ச்சியை வெளிப்படுத்தி வருகின்றனர். அதிர்ஷ்டவசமாக இந்த சம்பவத்தில் யாருக்கும் எந்த காயமும் ஏற்படவில்லை என்றும், பாதிக்கப்பட்ட பார்வையாளர்களுக்கு இழப்பீடாக பூங்காவின் இலவச மறுவருகைக்கான டிக்கெட்டுகள் வழங்கப்பட்டதாகவும் பூங்கா நிர்வாகம் தரப்பில் தெரிவிக்கப்பட்டுள்ளது.