‘ஐயோ பாவம்’…. நண்பர்களுடன் ஜாலியாக குளிக்கச் சென்ற மாணவனுக்கு நேர்ந்த சோகம்…. ராட்சத அலையில் சிக்கி பிளஸ்-1 மாணவன் பரிதாபப் பலி….!

சென்னை எண்ணூர் கடற்கரையில் நண்பர்களுடன் கடலில் குளித்துக் கொண்டிருந்தபோது ஏற்பட்ட ராட்சத அலையில் சிக்கி பிளஸ்-1 மாணவர் ஒருவர் பரிதாபமாக உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது. அவருடன் கடலில் அடித்துச் செல்லப்பட்ட மற்றொரு பள்ளி மாணவர் மீட்கப்பட்டு, தற்போது மருத்துவமனையில் உயிருக்கு ஆபத்தான நிலையில் தீவிர சிகிச்சை பெற்று வருகிறார்.

சென்னை எர்ணாவூர் பெரிய காசி கோவில் குப்பம் பகுதியைச் சேர்ந்தவர் தங்கராஜ். இவருடைய மகன் கவுதம் (15), அப்பகுதியில் உள்ள ஒரு பள்ளியில் பதினொன்றாம் வகுப்பு படித்து வந்தார். நேற்று மாலை, கவுதம் தனது அண்டை வீட்டைச் சேர்ந்த பத்தாம் வகுப்பு மாணவனான ஜோதிஷ் (15) மற்றும் சில நண்பர்களுடன் சேர்ந்து எண்ணூர் பெரியக்குப்பம் கடற்கரைக்குச் சென்றுள்ளார். வார இறுதி நாள் என்பதால், நண்பர்கள் அனைவரும் மகிழ்ச்சியாகக் கடலில் இறங்கி குளித்துக் கொண்டிருந்துள்ளனர்.

அப்போது எதிர்பாராத விதமாக எழுந்த ராட்சத அலை ஒன்று, குளித்துக் கொண்டிருந்த கவுதம் மற்றும் ஜோதிஷ் ஆகிய இருவரையும் கண் இமைக்கும் நேரத்திற்குள் கடலின் ஆழமான பகுதிக்கு இழுத்துச் சென்றது. அலைகளின் சீற்றத்தில் சிக்கி இருவரும் உயிருக்குத் போராடுவதைக் கண்டு கரையில் இருந்தவர்கள் அதிர்ச்சியடைந்தனர். உடனடியாக உள்ளூர் மக்கள் மற்றும் மீனவர்கள் விரைந்து செயல்பட்டு, கடலில் தத்தளித்துக் கொண்டிருந்த இரு மாணவர்களையும் மீட்டு கரைக்குக் கொண்டு வந்தனர்.

பின்னர், 108 அவசர மருத்துவ ஊர்தி மூலம் இருவரும் சென்னை ஸ்டான்லி அரசு மருத்துவமனைக்குக் கொண்டு செல்லப்பட்டனர். அங்கு இருவரையும் பரிசோதித்த மருத்துவர்கள், கவுதம் மருத்துவமனைக்குக் கொண்டு வரும் வழியிலேயே உயிரிழந்துவிட்டதாகத் தெரிவித்தனர். மேலும், படுகாயமடைந்த ஜோதிஷுக்கு தீவிர சிகிச்சைப் பிரிவில் தொடர்ந்து சிகிச்சை அளிக்கப்பட்டு வருகிறது. இச்சம்பவம் குறித்து எண்ணூர் காவல்துறையினர் வழக்குப் பதிவு செய்து தீவிர விசாரணை மேற்கொண்டு வருகின்றனர். கடற்கரைகளில் எச்சரிக்கைகளை மீறி ஆழமான பகுதிக்குச் சென்று குளிப்பதைத் தவிர்க்க வேண்டும் என சமூக ஆர்வலர்கள் மீண்டும் கோரிக்கை விடுத்துள்ளனர்.