யார் சாமி நீ… வலது கை உடைந்த நிலையிலும்… ஒற்றைக் கையால் பைக் ஓட்டிய நபர்… இணையத்தை அதிரவைத்த வைரல் வீடியோ…!!

சமூக வலைதளங்களில் ஒரு விசித்திரமான மற்றும் அதிர்ச்சியூட்டும் வீடியோ வேகமாக வைரலாகி வருகிறது. அதில், ஒரு நபர் தனது வலது கையில் மாவுக்கட்டு போட்டிருக்கும் நிலையிலும், சாலையில் சாதாரணமாக மோட்டார் சைக்கிள் ஓட்டிச் செல்கிறார். வழக்கமாக வலது கையின் உதவியின்றி பைக் ஓட்டுவது சாத்தியமற்றது என்பதால், இந்த வீடியோவைப் பார்த்த இணையவாசிகள் பெரும் வியப்பில் ஆழ்ந்துள்ளனர்.

பைக் ஓட்டுவதற்கு மிக முக்கியமாக தேவைப்படும் ஆக்சிலரேட்டர் வலது பக்க கைப்பிடியில் தான் இருக்கும். ஆனால், அந்த நபரின் வலது கை உடைந்திருப்பதால், அவர் தனது இடது கையை நீட்டி வலது பக்க கைப்பிடியைப் பிடித்து பைக்கைக் கட்டுப்படுத்துகிறார். ஒரே கையால் பைக்கின் இருபுறத்தையும் சமநிலைப்படுத்தி, எந்தவித பதற்றமும் இல்லாமல் அவர் வாகனம் ஓட்டும் விதம் பார்ப்பவர்களை ஆச்சரியத்தில் ஆழ்த்தினாலும், இது மிகவும் ஆபத்தான ஒரு செயலாகும்.

எக்ஸ் தளத்தில் பகிரப்பட்டுள்ள இந்த வீடியோவைக் கண்டு நெட்டிசன்கள் தங்களது கருத்துக்களைத் தெரிவித்து வருகின்றனர். சிலர் அவரது இந்த விசித்திரமான சமநிலைத் திறனைக் கண்டு வியந்தாலும், பெரும்பாலானோர் இது மிகவும் ஆபத்தானது மற்றும் பொறுப்பற்ற செயல் என்று கடுமையாக விமர்சித்துள்ளனர். சாலையில் அதிக போக்குவரத்து இருக்கும் போது திடீரென ஏதேனும் வாகனம் குறுக்கே வந்தால் பெரும் விபத்து ஏற்பட வாய்ப்புள்ளதால், இது போன்ற ஆபத்தான காரியங்களை யாரும் செய்ய வேண்டாம் என்றும் பயனர்கள் எச்சரித்து வருகின்றனர்.