“கோடி ரூபாய் பிளாட்டை ‘நரகம்’.. வெளியே ஆடம்பரம்… உள்ளே அவதி… நகரத்து வாழ்க்கையை வெறுத்த நொய்டா இளையர்… இணையத்தில் விவாதத்தைக் கிளப்பிய வீடியோ”…!!

பெரிய நகரங்கள், அடுக்குமாடி குடியிருப்புகள் (Flats) மற்றும் வானளாவிய கட்டிடங்கள் பலரின் கனவாக இருந்தாலும், அவை எப்போதும் மகிழ்ச்சியைத் தருவதில்லை என்பதை நொய்டாவைச் சேர்ந்த புனீத் ஜிண்டால் என்ற நபர் தனது வீடியோ மூலம் வெளிப்படுத்தியுள்ளார். கோடிக்கணக்கான ரூபாய் மதிப்புள்ள சொகுசு பிளாட்களின் மதிப்பு வெறும் ‘பூஜ்ஜியம்’ என்று கூறும் அவர், ஆரம்பத்தில் அங்குள்ள நீச்சல் குளம், கிளப் ஹவுஸ், ஸ்போர்ட்ஸ் ஏரியா, நீராவி குளியல் (Steam Bath) போன்ற ஆடம்பர வசதிகளைக் காட்டுகிறார். ஆனால், இந்த வெளிப்புற ஆடம்பரங்களுக்குப் பின்னால் இருக்கும் நிஜ வாழ்க்கை எவ்வளவு வெறுமையானது என்பதை அவர் அடுத்தடுத்து விளக்குகிறார்.

தனது பிளாட்டிற்குள் இருக்கும் திறந்தவெளி சமையலறையை (Open Kitchen) காட்டும் புனீத், சமையலறையில் தாளிப்பு செய்யும்போது அதன் புகை அருகில் இருக்கும் பால்கனி வரை பரவி, அங்கு தியானம் செய்யக்கூட முடியாத அளவுக்குப் பாதிப்பை ஏற்படுத்துவதாகக் கூறுகிறார். அதேபோல், குளியலறையின் துர்நாற்றம் மற்ற இடங்களுக்குப் பரவாமல் இருக்க எப்போதும் எக்ஸாஸ்ட் ஃபேனை ஓடவிட வேண்டியுள்ளது என்றும், கதவுகளை எப்போதும் மூடியே வைத்திருக்க வேண்டியுள்ளது என்றும் குறிப்பிடுகிறார். எல்லாவற்றிற்கும் மேலாக, வீட்டை விட்டு வெளியே வந்தால் சுவாசிப்பதற்குத் தூய்மையான காற்று (Fresh Air) கூடக் கிடைப்பதில்லை என்று நொய்டாவின் பிளாட் வாழ்க்கையை அவர் சாடுகிறார்.

இத்தகைய பிளாட்களை வாங்குவதற்காக மக்கள் 20 ஆண்டுகள் வரை கடன் (Home Loan) வாங்கி, அதைத் திருப்பிச் செலுத்த ஒரு நாளைக்கு 8 முதல் 10 மணி நேரம் வரை வேலை செய்கிறார்கள். தங்களின் மாதச் சம்பளத்தில் 50% முதல் 60% வரை கடனுக்கே கொடுத்துவிட்டு, மக்கள் தங்களின் சுய விருப்பத்தின் பேரிலேயே இந்த அடுக்குமாடி வாழ்க்கைக்கு அடிமைகளாக மாறிவிடுகிறார்கள் என்று புனீத் ஆதங்கப்படுகிறார். கிராமப்புறங்களில் 25,000 ரூபாய் வருமானம் இருந்தாலே சிறப்பான வாழ்க்கை முறையை வாழ முடியும், ஆனால் நகரத்தில் 1 லட்சம் ரூபாய் இருந்தாலும் பற்றாக்குறைதான் என்று கூறும் அவர், தனது பார்வையில் இந்த நகரத்து பிளாட் வாழ்க்கை என்பது ஒரு ‘நரகம்’ (Hell) போன்றது என்று கடுமையான வார்த்தைகளால் முடித்துள்ளார்.