வணிகர்களே உஷார்!.. AI தொழில்நுட்பத்தால் வந்த புது ஆபத்து…. அசல் எது? போலி எது? கண்டுபிடிக்க முடியாத பகீர் பின்னணி…!!

ஓடிபி மற்றும் டிஜிட்டல் அரெஸ்ட் போன்ற நூதன முறைகளில் பொதுமக்களை ஏமாற்றி வந்த சைபர் குற்றவாளிகள், தற்போது தங்களின் பார்வையை வியாபாரிகள் மற்றும் தொழிலதிபர்கள் பக்கம் திருப்பியுள்ளனர். குறிப்பாக, அடகு வைக்கப்பட்ட நகைகளை மீட்டு விற்பனை செய்வதற்கு நிதி உதவி அளிக்கும் தொழில்முனைவோர்களை இவர்கள் முக்கிய இலக்காகக் கொண்டுள்ளனர். நகையை மீட்ட பிறகு அதனை விற்று கணிசமான லாபத்தைப் பகிர்ந்துகொள்ளலாம் என்று ஆசை வார்த்தை கூறி, வணிகர்களின் நம்பிக்கையைத் தவறாகப் பயன்படுத்தி இந்த புதிய வகை மோசடியை அரங்கேற்றுகின்றனர்.

இதற்கு உதாரணமாக புதுச்சேரியைச் சேர்ந்த ஒரு தொழிலதிபரிடம் சமீபத்தில் ரூபாய் 5.60 லட்சம் ஏமாற்றப்பட்டுள்ளது. சென்னை வங்கியில் அடகில் இருக்கும் தனது நகையை மீட்க உதவுமாறு கூறி ஒரு நபர் இவரை அணுகியுள்ளார். தொழிலதிபரை நம்ப வைப்பதற்காக மிகவும் தத்ரூபமாக வடிவமைக்கப்பட்ட போலியான வங்கி ரசீதுகள், ஆதார் அட்டை உள்ளிட்ட ஆவணங்களை அந்த நபர் சமர்ப்பித்துள்ளார். பணத்தைப் பெற்றுக்கொண்ட மோசடிக்காரன், மறுநாள் அனுப்பிய போலி வங்கி வரைவோலை மற்றும் அவன் கூறிய வங்கி கிளைகளில் இருந்த முரண்பாடுகளைக் கண்டு சந்தேகித்து விசாரித்த போதுதான், ஒட்டுமொத்த ஆவணங்களும் போலியானவை என்பது அந்தத் தொழிலதிபருக்குத் தெரியவந்துள்ளது.

நவீன தொழில்நுட்பங்கள் மற்றும் செயற்கை நுண்ணறிவு கருவிகளின் அசுர வளர்ச்சியால், அசலைப் போலவே போலி ஆவணங்களை உருவாக்குவது இன்று மிகவும் எளிதாகிவிட்டது. எனவே, தொழில்முனைவோர்கள் அடையாளம் தெரியாத நபர்கள் காண்பிக்கும் எந்தவொரு காகித ஆவணத்தையோ அல்லது அடையாள அட்டையையோ கண்மூடித்தனமாக நம்பி பணத்தை முதலீடு செய்யக் கூடாது. சம்பந்தப்பட்ட வங்கி அல்லது நிறுவனத்திடம் நேரடியாகச் சென்று ஆவணங்களின் உண்மைத்தன்மையை உறுதி செய்த பின்னரே பணப் பரிவர்த்தனைகளில் ஈடுபட வேண்டும்; ஒருவேளை ஏமாற்றப்பட்டால், மௌனமாக இருக்காமல் உடனடியாக சைபர் குற்றப்பிரிவில் புகார் அளிப்பது மேலும் பலர் பாதிக்கப்படுவதைத் தடுக்கும்.