அம்பானி வீட்டுப் பிறந்தநாள்னா சும்மாவா?… 3,000 கிலோ பழங்கள்.. தும்பிக்கையில் கேக்… ஆனந்த் பிறந்தநாளில் யானைகளுக்குச் செய்த நெகிழ்ச்சிச் செயல்..!!

ரிலையன்ஸ் இண்டஸ்ட்ரீஸ் குழுமத்தின் இயக்குநரும், ‘வந்தாரா’ விலங்குகள் நல அமைப்பின் நிறுவனருமான ஆனந்த் அம்பானி, தனது 31-வது பிறந்தநாளை நாளை (ஏப்ரல் 10) கொண்டாடுகிறார். இதனை முன்னிட்டு, ஜெய்ப்பூர் அருகிலுள்ள ஹாதி கான் பகுதியில் யானைகளுக்காக 3,000 கிலோ எடையுள்ள பிரம்மாண்ட பழ விருந்து அளிக்கப்பட்டது. யானைகள் பாதுகாப்பு மற்றும் விலங்குகள் நலனில் ஆனந்த் அம்பானி காட்டி வரும் ஈடுபாட்டைக் கௌரவிக்கும் வகையில் இந்தச் சிறப்பு நிகழ்ச்சிக்கு ஏற்பாடு செய்யப்பட்டிருந்தது.

இந்தக் கொண்டாட்டத்தில் வாழைப்பழம், ஆப்பிள், தர்பூசணி, கரும்பு மற்றும் பப்பாளி உள்ளிட்ட யானைகளுக்குப் பிடித்தமான பழங்கள் ஏராளமாக வழங்கப்பட்டன. விழாவின் சிறப்பம்சமாக பாபு, புஷ்பா மற்றும் சந்தா ஆகிய மூன்று யானைகள் தங்களது தும்பிக்கை மூலம் கேக் வெட்டி ஆனந்த் அம்பானியின் பிறந்தநாளைக் கொண்டாடின. மேலும், யானைகளைப் பராமரிக்கும் பாகன்களுக்குத் தேவையான ரேஷன் பொருட்கள் மற்றும் ஆடைகள் உள்ளிட்ட அத்தியாவசிய உபகரணங்கள் வழங்கி அவர்கள் கௌரவிக்கப்பட்டனர்.

குஜராத்தின் ஜாம்நகரில் 3,500 ஏக்கர் பரப்பளவில் ‘வந்தாரா’ எனும் உலகின் மிகப்பெரிய வனவிலங்கு மறுவாழ்வு மையத்தை ஆனந்த் அம்பானி நடத்தி வருகிறார். துன்புறுத்தப்பட்ட மற்றும் கைவிடப்பட்ட 200-க்கும் மேற்பட்ட வனவிலங்கு இனங்களுக்குப் புகலிடமாகத் திகழும் இந்த மையத்தின் மூலம் அவர் ஆற்றி வரும் பணிகளைப் பாராட்டி ஹாதி கான் விகாஸ் சமிதி இந்த விழாவை ஒருங்கிணைத்தது. யானைகள் அனைத்தும் பாரம்பரிய ராஜஸ்தானி முறையில் அலங்கரிக்கப்பட்டு, மேளதாளங்களுடன் இந்த விழா மிகச் சிறப்பாக நடைபெற்றது.