யார் சாமி நீ… ஒரு நாள் கூட ஆபீஸ் போகல… ஆனா கணக்குல ஏறியது ரூ 37.54 லட்சம்… அரசு அதிகாரியின் பலே லஞ்ச லீலை… நெட்டிசென்கள் ஷாக்…!!

ராஜஸ்தான் தகவல் தொழில்நுட்பத் துறையின் இணை இயக்குநரான பிரத்யுமன் தீக்சித், அரசு டெண்டர்களை வழங்குவதற்குப் பதிலாக, இரு தனியார் நிறுவனங்களிடம் இருந்து தன் மனைவி பூனம் தீக்சித்திற்கு சட்டவிரோதமாகச் சம்பளம் பெற வழிவகை செய்துள்ளார். எந்தவொரு அலுவலகத்திற்கும் நேரில் செல்லாமலேயே பூனம் தீக்சித்திற்கு ரூ 37.54 லட்சம் சம்பளமாக வழங்கப்பட்ட இந்த மோசடி விவகாரம், ராஜஸ்தான் உயர் நீதிமன்றத்தில் தாக்கல் செய்யப்பட்ட புகாரின் மூலம் வெளிச்சத்திற்கு வந்தது.

உயர் நீதிமன்ற உத்தரவின்படி விசாரணையைத் தொடங்கிய ஊழல் தடுப்புப் பிரிவு, 2019 ஜனவரி முதல் 2020 செப்டம்பர் வரையிலான காலத்தில் ‘ஓரியன்ப்ரோ சொல்யூஷன்ஸ்’ மற்றும் ‘டிரீஜன் சாஃப்ட்வேர்’ ஆகிய நிறுவனங்கள் பூனத்தின் ஐந்து வங்கிப் கணக்குகளுக்குச் சம்பளம் என்ற பெயரில் ரூ 37,54,405 அனுப்பியதை உறுதி செய்தது. அரசு டெண்டர்களைப் பெற்றுத் தருவதற்குப் பிரதிபலனாகவே தன் மனைவிக்கும் பணி வழங்கி, மாதம் தோறும் சம்பளம் தருமாறு பிரத்யுமன் தீக்சித் அந்நிறுவனங்களைக் கேட்டுக்கொண்டுள்ளார்.

இந்தக் காலக்கட்டத்தில் பூனம் ஒருமுறை கூட அலுவலகத்திற்குச் சென்றதில்லை; மாறாக, அவரது கணவரே அவரது போலி வருகைப் பதிவேட்டை அங்கீகரித்து வந்துள்ளார். மேலும், பூனம் ஒரே நேரத்தில் ஓரியன்ப்ரோ நிறுவனத்தில் போலி ஊழியராகவும், டிரீஜன் நிறுவனத்தில் ‘ஃப்ரீலான்ஸர்’ என்ற பெயரிலும் இரு வேறு நிறுவனங்களிடம் ஒரே சமயத்தில் பணம் பெற்று வந்ததும், இக்காலகட்டத்தில் அந்நிறுவனங்களுக்கு அரசு டெண்டர்கள் ஒதுக்கப்பட்டதும் ஊழல் தடுப்புப் பிரிவின் விசாரணையில் அம்பலமாகியுள்ளது.