இதயத்தை உலுக்கும் காட்சி: “நீ தான் என்னோட அம்மா” கைவிட்ட தாய்… பொம்மையையே தாயாக நினைத்துக் கட்டிப்பிடித்துக் கிடக்கும் குட்டிக்குரங்கு..!!

ஜப்பானில் உள்ள ஒரு மிருகக்காட்சிசாலையில் கடந்த ஜூலை மாதம் பிறந்த ‘பஞ்ச்’ என்ற குட்டி ஜப்பானிய குரங்கை (Macaque), அதன் தாய் பிறந்ததுமே பராமரிக்க மறுத்துக் கைவிட்டது. தாயின் அரவணைப்பு இல்லாமல் தவித்த அந்தக் குட்டிக்குரங்கு, மிகுந்த மன அழுத்தத்திற்கும் பயத்திற்கும் உள்ளானது. இதைக் கண்ட அங்கிருந்த ஊழியர்கள், அதற்கு ஆறுதல் அளிக்கும் வகையில் ஒரு பஞ்சுப் பொம்மையை (Stuffed Toy) வழங்கினர். வியப்பிற்குரிய வகையில், அந்தக் குட்டிக்குரங்கு அந்தப் பொம்மையைச் தனது தாயாகவே ஏற்றுக்கொண்டு, எங்குச் சென்றாலும் அதைத் தன்னுடன் தூக்கிச் செல்லத் தொடங்கியது.

குறிப்பாக, உறங்கும்போதும் மற்ற குரங்குகளுடன் பழகும்போதும் அந்தப் பொம்மையை இறுகக் கட்டிப்பிடித்துக் கொள்வதை வழக்கமாகக் கொண்டுள்ளது. பஞ்ச் குட்டி அந்தப் பொம்மையை அணைத்துக் கொண்டு இருக்கும் காணொலிகள் சமூக வலைதளங்களில் வெளியாகிப் பலரது இதயங்களையும் நெகிழச் செய்துள்ளது. தற்போது அந்தப் பஞ்சுப் பொம்மையைத் தனது பாதுகாப்பு கவசமாகக் கருதும் பஞ்ச், மெல்ல மெல்ல மற்ற குரங்குகளுடன் பழகத் தொடங்கி வருவதாக மிருகக்காட்சிசாலை அதிகாரிகள் தெரிவித்துள்ளனர். தாய்ப்பாசத்திற்காக ஒரு பொம்மையை ஏந்தி நிற்கும் இந்தக் குட்டிக்குரங்கின் நிலை காண்போரைச் சோகத்தில் ஆழ்த்தியுள்ளது.