உத்தரப் பிரதேச மாநிலம் அமேதி மாவட்டத்தைச் சேர்ந்த 13 வயது சிறுமி ஒருவர் பெண் குழந்தையைப் பெற்றெடுத்துள்ளார். பிரசவத்திற்குப் பிறகு அச்சிறுமியின் உடல்நிலை மோசமடைந்ததை அடுத்து இந்த அதிர்ச்சித் தகவல் வெளிச்சத்திற்கு வந்துள்ளது. தற்போது சிறுமியும் அவரது பச்சிளம் பெண் குழந்தையும் சிகிச்சைக்காக ரேபரேலியில் உள்ள மாவட்ட மருத்துவமனையில் அனுமதிக்கப்பட்டுள்ளனர். அங்கு மருத்துவர்கள் அடங்கிய தனிக்குழு இருவரின் உடல்நிலையையும் தீவிரமாகக் கண்காணித்து வருகிறது.
இந்த விவகாரம் தொடர்பாக சிறுமியின் தாய் அளித்த புகாரின் பேரில் போலீசார் நடவடிக்கை எடுத்துள்ளனர். தனது தாய்மாமன் மகன் சிறுமியைப் பாலியல் வன்கொடுமை செய்ததாக அந்தப் புகாரில் தெரிவிக்கப்பட்டுள்ளது. இதனைத் தொடர்ந்து, குற்றம் சாட்டப்பட்ட நபர் மீது போக்சோ சட்டத்தின் கீழ் வழக்குப் பதிவு செய்யப்பட்டு அவர் கைது செய்யப்பட்டுள்ளார்.
அமேதி மாவட்டத்தின் சிவ்ரதன்கஞ்ச் காவல் நிலைய எல்லைக்குட்பட்ட கிராமம் ஒன்றில் இந்தச் சம்பவம் நடந்துள்ளது. பாதிக்கப்பட்ட சிறுமியின் பாதுகாப்பு மற்றும் மருத்துவ நலனைக் கருத்தில் கொண்டு, காவல்துறை மற்றும் மாவட்ட நிர்வாகம் தொடர்ந்து அடுத்தகட்ட சட்டப்பூர்வமான மற்றும் மருத்துவ உதவிகளை மேற்கொண்டு வருகிறது.