ஹரியானாவின் பஞ்ச்குலா மாவட்டத்தில் உள்ள ஒரு அரசுப் பள்ளியின் வகுப்பறைக்குள் ஆறு வயது சிறுமி, அதே பள்ளியைச் சேர்ந்த எட்டு வயது சிறுவனால் உடல்ரீதியாகக் தாக்கப்பட்டார். இதில் பலத்த காயமடைந்த அச்சிறுமி உடனடியாகச் சண்டிகரில் உள்ள மருத்துவமனையில் அனுமதிக்கப்பட்டு, தீவிர சிகிச்சை பெற்று வந்தார். மருத்துவக் குழுவினரின் தொடர் சிகிச்சைக்குப் பிறகு சிறுமியின் உடல்நிலையில் முன்னேற்றம் ஏற்பட்டதை அடுத்து, அவர் தற்போது மருத்துவமனையிலிருந்து டிஸ்சார்ஜ் செய்யப்பட்டுள்ளார்.
இந்தச் சம்பவம் குறித்துப் பஞ்ச்குலா காவல்துறையினர் வழக்குப் பதிவு செய்து தீவிர விசாரணை மேற்கொண்டு வருகின்றனர். தாக்குதலுக்கான பின்னணி மற்றும் வகுப்பறைக்குள் இந்த அசம்பாவிதம் நிகழ்ந்தபோது ஆசிரியர்கள் அல்லது பள்ளி ஊழியர்கள் யாரேனும் கண்காணிப்பில் இருந்தனரா என்பது குறித்தும் அதிகாரிகள் ஆய்வு செய்து வருகின்றனர். சிறுவர்களின் பாதுகாப்பில் ஏற்பட்ட இந்தத் தவறு குறித்து பள்ளி நிர்வாகத்திடமும் விசாரணை நடத்தப்பட்டு வருகிறது.
பள்ளிக் வளாகத்திற்குள்ளேயே சிறுமி தாக்கப்பட்ட சம்பவம் அப்பகுதி மக்களிடையே பெரும் அதிர்ச்சியையும் கவலையையும் ஏற்படுத்தியுள்ளது. இதற்கிடையே, அரசுப் பள்ளிகளில் மாணவர்களின் பாதுகாப்பை பலப்படுத்தவும், இதுபோன்ற சம்பவங்கள் மீண்டும் நிகழாமல் தடுக்கவும் கடுமையான பாதுகாப்பு நடவடிக்கைகளை மேற்கொள்ள வேண்டும் எனப் பெற்றோர்களும் சமூக ஆர்வலர்களும் கோரிக்கை விடுத்துள்ளனர்.