தமிழக சட்டமன்றத் தேர்தலுக்குப் பிறகு மாநில அரசியல் களத்தில் அதிரடி மாற்றங்கள் அரங்கேறி வருகின்றன. தமிழக வெற்றிக் கழகம் ஆட்சியைப் பிடித்து ஆறு மாதங்கள் நிறைவடைந்துள்ள நிலையில், திமுக, அதிமுக, நாம் தமிழர் மற்றும் பாஜக உள்ளிட்ட பல்வேறு எதிர்க்கட்சிகள் தவெக அரசின் செயல்பாடுகளைத் தொடர்ந்து விமர்சித்து வருகின்றன. குறிப்பாக, திமுக முன்னாள் அமைச்சர்கள் மீதான கைது நடவடிக்கைகள் மற்றும் லஞ்ச ஒழிப்பு ரெய்டுகளில் தவெக அரசு தீவிரம் காட்டி வரும் சூழலில், அரசியல் களம் மேலும் சூட பிடித்துள்ளது.
இந்நிலையில், சென்னை திமுக கிழக்கு மாவட்ட மகளிரணி சார்பில் நடைபெற்ற தீபாவளி கொண்டாட்ட நிகழ்ச்சியில் பங்கேற்றுப் பேசிய முன்னாள் அமைச்சரும் திமுக எம்.எல்.ஏ-வுமான சேகர்பாபு, தவெக அரசை மிகக் கடுமையாகச் சாடினார். விபத்தில் காலில் காயமடைந்து மீண்டு வந்த கவுன்சிலர் கனிமொழி மற்றும் திமுக மகளிரணியினருக்கு எத்தகைய பிரச்சனை வந்தாலும் அவர்களுக்கு அரணாக நின்று பாதுகாக்கும் பொறுப்பு தமக்கு இருப்பதாகத் தெரிவித்த அவர், கழக மகளிரணி எந்தவொரு சவாலையும் எதிர்கொண்டு சிறை செல்லவும் தயாராக இருப்பதாகப் பெருமிதத்துடன் குறிப்பிட்டார்.
திமுகவுக்கு பொதுவாக தீபாவளி பண்டிகையைக் கொண்டாடுவதில் கொள்கை ரீதியான உடன்பாடு இல்லை என்றாலும், இந்நிகழ்ச்சி நடத்தப்படுவதற்கான பின்னணியை அவர் சுட்டிக்காட்டினார். “தோல்விகள் பல கண்டாலும் திமுக ஒருபோதும் துவண்டுவிடுவதில்லை. நம் மீது எத்தனை சுமைகள் சுமத்தப்பட்டாலும் துணிவுடன் நிமிர்ந்து நிற்கும் ஆற்றல் நமக்கு உண்டு. தற்போது தமிழ்நாட்டில் நரகாசுரனின் ஆட்சி தான் நடைபெற்றுக்கொண்டிருக்கிறது. தேவர்களாகிய தமிழக மக்களைத் துன்புறுத்திய நரகாசுரனைப் போலத்தான் தற்போதைய ஆட்சியாளர்களின் செயல்பாடுகள் அமைந்திருக்கின்றன” என்று அவர் விமர்சித்தார்.
மேலும் நரகாசுர வதம் குறித்த புராணக் கதையைக் குறிப்பிட்ட சேகர்பாபு, மக்களையும் தேவர்களையும் துன்புறுத்திய நரகாசுரன் இறுதியில் கிருஷ்ண பரமாத்மாவால் வதம் செய்யப்பட்டதை நினைவுகூர்ந்தார். இறக்கும் தருவாயில் தான் மறைந்த நாளை மக்கள் அனைவரும் தீபாவளியாகக் கொண்டாட வேண்டும் என நரகாசுரன் வரம் கேட்ட கதையைக் கூறிய அவர், “தமிழகத்தில் மக்களைத் துன்புறுத்தி வரும் இன்றைய நரகாசுர ஆட்சியை வீழ்த்தி ஒழிக்கும் நாள் தான், தமிழ்நாட்டு மக்களுக்கு உண்மையான தீபாவளி பண்டிகையாக அமையும்” என்று ஆவேசமாக உரையாற்றினார்.