சென்னை மாநகராட்சிப் பகுதிகளில் பருவமழை கால நிவாரணப் பணிகளை மேலும் துரிதப்படுத்தும் வகையிலும், பேரிடர் மேலாண்மையை திறம்பட கையாளும் வகையிலும் அமைச்சர்கள் மற்றும் சட்டப்பேரவை உறுப்பினர்களுக்கு வாக்கி-டாக்கி (Walkie-Talkie) கருவிகள் வழங்கும் புதிய திட்டம் அமல்படுத்தப்பட்டுள்ளது. சென்னை ரிப்பன் மாளிகையில் நடைபெற்ற இந்நிகழ்வில், 7 பொறுப்பு அமைச்சர்கள் மற்றும் சென்னையைச் சேர்ந்த தவெக சட்டமன்ற உறுப்பினர்களுக்கு இக்கருவிகள் அதிகாரப்பூர்வமாக விநியோகிக்கப்பட்டுள்ளன.
கனமழை மற்றும் புயல் காலங்களில் பொதுமக்கள் அவதிப்படும்போது, மின்வெட்டு அல்லது கடுமையான மழையின் காரணமாக செல்போன் சிக்னல்கள் துண்டிக்கப்பட வாய்ப்புள்ளது. இத்தகைய துயரச் சூழல்களிலும் எந்தவிதத் தடையுமின்றி உடனடியாகத் தொடர்புகொண்டு, மக்களின் குறைகளைக் கேட்டறிந்து துரிதமாகத் தீர்வு காண முடியும் என்ற தொலைநோக்குடன் அரசு இந்த நடவடிக்கையை எடுத்துள்ளது. இதன் மூலம் பேரிடர் கால மீட்புப் பணிகள் மேலும் வேகம் பெறும் என எதிர்பார்க்கப்படுகிறது.