வெறும் ஆறு வயதே நிரம்பிய ஒரு சிறுவன் தன் ஆசிரியை அப்பி ஸ்வெர்னரை துப்பாக்கியால் சுட்ட சம்பவம், ஒட்டுமொத்த உலகத்தையும் அதிர்ச்சியில் ஆழ்த்தியுள்ளது. இந்த துயர சம்பவத்திற்கு முதன்மை காரணியாக அமைந்தது அச்சிறுவனின் தாய் என்பதில் மாற்றுக்கருத்து இல்லை. ஒரு சிறு குழந்தை எளிதில் கைபற்றும் வகையில், தோட்டாக்கள் நிரப்பப்பட்ட துப்பாக்கியை வீட்டில் பாதுகாப்பற்ற முறையில் போட்டு வைத்ததே இந்த அசம்பாவிதத்தின் தொடக்கப்புள்ளியாகும். அதுமட்டுமன்றி, காவல்துறையினரையே கெட்ட வார்த்தைகளால் திட்டி, தாயின் துப்பாக்கியை எடுத்து வந்ததாகப் பெருமை பேசும் அந்தச் சிறுவனின் நடத்தை, அவனது இல்லத்தில் நிலவிய தவறான வழிகாட்டுதலையும் வளர்ப்பு முறையையுமே அப்பட்டமாகக் காட்டுகிறது.
இருப்பினும், பள்ளி நிர்வாகத்தின் அலட்சியத்தை எவ்விதத்திலும் குறைத்து மதிப்பிட முடியாது. அச்சிறுவனிடம் துப்பாக்கி இருப்பது குறித்து சக ஆசிரியர்களும் பணியாளர்களும் அளித்த பல எச்சரிக்கைகளை, உதவித் தலைமை ஆசிரியர் முற்றிலுமாகப் புறக்கணித்து அலட்சியப்படுத்தியுள்ளார். சரியான நேரத்தில் பள்ளி நிர்வாகம் தலையிட்டு அச்சிறுவனைச் சோதனையிட்டிருந்தால், இந்த கொடூர சம்பவத்தை எளிதாகத் தடுத்திருக்க முடியும். தன் கடமையைச் செய்யத் தவறி, ஒரு ஆசிரியையின் உயிரைப் பணயம் வைத்த காரணத்தினாலேயே, நீதிமன்றம் பள்ளி நிர்வாகத்திற்கு 10 மில்லியன் டாலர் நஷ்டஈடு வழங்க உத்தரவிட்டதுடன், தாய்க்கும் சிறைத்தண்டனை விதித்தது.
எனவே, ஆசிரியை அப்பி ஸ்வெர்னருக்கு நேர்ந்த இந்த நிலைக்கு தாயும் பள்ளி நிர்வாகமும் சம அளவிலேயே பொறுப்பாவார்கள். ஒரு குழந்தைக்கு ஒழுக்கத்தையும், பாதுகாப்பான சூழலையும் உருவாக்கத் தவறிய தாய் முதல் தவறைச் செய்தார் என்றால், கையில் ஆயுதத்தோடு சுற்றிய சிறுவனைப் பற்றித் தெரிந்தும் அதைத் தடுக்கத் தவறிய பள்ளி நிர்வாகம் அடுத்த தவறைச் செய்தது. இல்லத்தில் பாதுகாப்பற்ற சூழலும், பள்ளியில் பொறுப்பற்ற நிர்வாகமும் ஒன்றாக இணைந்ததன் விளைவே, ஒரு நிரபராதி ஆசிரியை தனது வாழ்நாளில் ஆறா வடுக்களைச் சுமக்க வேண்டிய நிலைக்குத் தள்ளியது.