தற்போதைய காலகட்டத்தில் மாறிவரும் வாழ்க்கை முறை மற்றும் முறையற்ற உணவுப் பழக்கவழக்கங்களால் இளம் வயதிலேயே பலர் இதயம் தொடர்பான கடுமையான பிரச்சனைகளுக்கு உள்ளாகி வருகின்றனர். இந்நிலையில், விசாகப்பட்டினத்தில் உள்ள பிரபல சிம்ஹாத்ரி மருத்துவமனையின் மருத்துவர் சுதாகர், இதயத்தை 20 ஆண்டுகள் இளமையாகவும் ஆரோக்கியமாகவும் வைத்திருப்பதற்கான சிறப்புப் பயிற்சி முறையைப் பரிந்துரைத்துள்ளார்.
‘நார்வேஜியன் 4×4 வொர்க்அவுட் என்று அழைக்கப்படும் இந்த ‘ஹை இன்டென்சிட்டி இன்டர்வெல் டிரெய்னிங்” கார்டியோ பயிற்சியானது, ஜப்பானில் 20,000 பேரிடம் நடத்தப்பட்ட ஆய்வின் அடிப்படையில் பெரும் நன்மைகளைத் தருவது உறுதி செய்யப்பட்டுள்ளது. தொடக்கத்தில் 5 முதல் 10 நிமிடங்கள் வரை லேசான பயிற்சிகளைச் செய்த பிறகு, 4 நிமிடங்கள் அதிவேகமாக ஓடுவது அல்லது கார்டியோ பயிற்சிகளை மேற்கொண்டு, பின்னர் 4 நிமிடங்கள் மெதுவாக நடப்பதன் மூலம் இதயத் துடிப்பைச் சீராக்கி தசைகளை வலுப்படுத்த முடியும்.
இந்த 4 நிமிட அதிவேகப் பயிற்சி மற்றும் 4 நிமிட ஓய்வு சுழற்சியை மொத்தம் 4 முறை செய்ய வேண்டும் என மருத்துவர் அறிவுறுத்துகிறார். ஆரம்ப கட்டத்தில் வாரத்திற்கு ஒரு முறையோ அல்லது இரு முறையோ செய்யத் தொடங்கி படிப்படியாக இதைப் பழக்கப்படுத்திக் கொள்ளலாம். ஏற்கனவே இதயப் பிரச்சனை உள்ளவர்கள் மற்றும் உடற்பயிற்சி செய்து பழக்கம் இல்லாதவர்கள் மருத்துவ ஆலோசனைக்குப் பிறகே இதைத் தொடங்க வேண்டும் என்றும் எச்சரிக்கப்பட்டுள்ளது.